افغانستاننینگ جنیوادهگی نمایندهسی نصیر احمد اندیشه، اَیریم اروپا دولتلرینینگ افغانستان مهاجرلرینی مجبوري روشده افغانستانگه دېپورت قیلیش یاکه اولرنی اوچینچی دولتلردهگی قَیتریش مرکزلریگه یوباریش مقصدیده طالبلر بیلن آلیب بارهیاتگن «شبههلی کېلیشوولری و مذاکرهلری» یوزهسیدن چوقور خواطر بیلدیرگن.
اندیشه بوگون (سهشنبه، ۲-سرطان) بیرلشگن ملتلر تشکیلاتینینگ مهاجرلر بۉییچه مخصوص گزارشگلری بیلن بۉلیب اۉتگن ییغیلیشده سۉزگه چیقیب، «بوندهی حرکتلر حمایه تیزیمیدهگی بۉشلیقلرنی ینه-ده کېنگهیتیرهدی و زنجیرلی دېپورت خوفینی آشیرهدی»، دېب تأکیدلهگن.
اونینگ ایتیشیچه، افغانستانگه قَیتیش عاقبتلری، اینیقسه عیاللر و قیزلر همده طالبان حکمرانلیگی آستیده تیزیملی تعقیب و باسیملرگه دوچ کېلهیاتگن سابق خوفسیزلیک کوچلری خادملری اوچون جوده آغیر بۉلیشی ممکن.
اندیشهنینگ تأکیدلشیچه، افغانستان فقرالری کۉچیریش و قَیته جایلشتیریشگه محتاج بۉلگن اېنگ ییریک قاچقین گروهلریدن بیرینی تشکیل اېتهدی. بیراق اولر اوچون قانوني مهاجرت یۉللری و مملکتنی ترک اېتیش حقوقیدن فایدهلنیش امکانیتلری تاباره چېکلنماقده.
اونینگ سۉزلریگه کۉره، ایلگری اوشبو ضعیف قتلمنی حمایه قیلگن قَیته جایلشتیریش دستورلری حاضرده تۉختهتیلگن یاکه موزلهتیب قۉییلگن. نتیجهده مینگلب افغانستانلیکلر اوچینچی دولتلرده، کۉپینچه قماققه اۉخشش شرایطلرده، ناانیق وضعیتده قالیب کېتگن.
اندیشه افغانستان نامیدن برچه دولتلرنی افغانستانده حاضرچه خوفسیز و اختیاري قَیتیش اوچون ضرور شرایطلر موجود اېمسلیگینی تن آلیشگه چقیردی. شونینگدېک، او دولتلردن انسان حقوقلری و قاچقینلر حقوقی بۉییچه خلق ارا مجبوريتلریگه موافق قانوني مهاجرت یۉللرینی کېنگهیتیریشنی سۉرهدی.
بو بیانات اروپا کمیسیونی طالبلرنینگ تخنیکي هیئاتینی بروکسلگه افغانستان مهاجرلرینی دېپورت قیلیش مسألهسینی محاکمه قیلیش اوچون تکلیف قیلگن بیر پیتده ینگرهماقده.
روېترز خبر آژانسی خبریگه کۉره، بلجیم اوشبو هیئت اعضالریگه بیر کونلیک ویزه بېرگن و اولر احتمال بوگون بروکسلگه یېتیب بارهدیلر.
