اروپا اتفاقی افغانستانگه قَیتیب کېلگن مهاجرلر و ایچکی کۉچیریلگن شخصلرنی قۉللب-قوّتلش مقصدیده خلقارا مهاجرت تشکیلاتی آرقهلی۲۰ میلیون یورو اجرهتیشینی اعلان قیلدی.
اروپا اتفاقینینگ کابلدهگی نمایندهلیگی بوگون (سهشنبه، ۲-سرطان) ترقهتگن بیاناتیده، اوشبو مالیوي یاردم افغانستان حلی هم دنیادهگی اېنگ ییریک و مرکّب انسانپرورلیک بحرانلریدن بیرینی باشدن کېچیرهیاتگن، عامهوي قَیتیشلر اېسه وضعیتنی ینه-ده آغیرلشتیرهیاتگن بیر پیتده تقدیم اېتیلهیاتگنینی معلوم قیلدی.
اروپا اتفاقینینگ افغانستاندهگی نمایندهلیگی سرپرستی ورونیکا بوسکویچ پوهار «اروپا اتفاقی افغانستانگه قَیتگن فقرالرنینگ جمعیتگه قَیته انتیگراسیونلشووینی قۉللب-قوّتلش مجبوريتیگه صادق قالهدی و اولرگه قرهملیکدن اۉزینی اۉزی تأمینلش باسقیچیگه اۉتیشده یاردم بېرهدی.»
اونینگ تأکیدلشیچه، بو جریانده خلق ارا مهاجرلر تشکیلاتی بیلن همکارلیک مهم اهمیتگه اېگه. اروپا اتفاقی ۲۰۲۲-ییلدن بویان افغانستاندهگی کۉچیش و مجبوري مهاجرت بحرانیگه جواب بېریش اوچون۱۴۰ میلیون یورودن آرتیق مبلغ اجرهتگن.
خلقارا مهاجرت تشکیلاتی نینگ افغانستاندهگی نمایندهلیگی مسوولی اۉرینباسری موتیا مسکون اروپا اتفاقینی اوشبو تشکیلات نینگ اوزاق ییللیک همکاری صفتیده تعریفلهدی.
او شوندهی دېدی: «میلیونلب افغانلر الّهقچان چېکلنگن منبعلر و خدمتلر بیلن کورهشهیاتگن جماعهلرگه قَیتیب کېلهیاتگن بیر پیتده، اوشبو یاردم ایامگه حیاتي مهم کۉمکلرنی کېنگهیتیریش، تیریکچیلیک منبعلرینی مستحکملش، کیچیک بیزنسلرنی قۉللب-قوّتلش و اجتماعي منبعلر مرکزلری آرقهلی ضرور خدمتلردن فایدهلنیش امکانیتلرینی آشیریشگه یاردم بېرهدی. بو اېسه قَیتیب کېلووچیلر و مېزبان جماعهلرگه ینه-ده برقرار کېلهجک قوریشده کۉمکلشهدی.»
اروپا اتفاقی معلوماتیگه کۉره، مذکور مبلغ قَیتیب کېلگن مهاجرلر، ایچکی کۉچیریلگنلر و مېزبان جماعهلرگه حمایه خدمتلری، ساغلیقنی سقلش، روحي-اجتماعي یاردم، تیریکچیلیک دستورلری همده تیکلنیش لایحهلری آرقهلی کومپلېکس کۉمک کۉرسهتیشنی کېنگهیتیرهدی. دستورلر، اینیقسه، قَیتیش درجهسی یوقاری بۉلگن ولایتلرده عملگه آشیریلهدی.
شونینگدېک، مبلغلر عیاللر و باشقه ضعیف قتلملرنینگ برقرار قَیته انتیگراسیونسینی قۉللب-قوّتلش، کسب-هنر تعلیمی، تیریکچیلیک دستورلری همده کیچیک و اۉرته کارخانهلرگه یاردم کۉرسهتیشگه یۉنهلتیریلهدی.
خلق ارا مهاجرت تشکیلاتی معلوماتلریگه کۉره، ۲۰۲۳-ییل سپتامبردن ۲۰۲۶-ییل مییگچه ایران و پاکستاندن۶.۴ میلیوندن آرتیق مهاجر افغانستانگه قَیتگن یاکه دېپورت قیلینگن.
تشکیلات معلوماتلریگه کۉره، فقط ۲۰۲۵-ییل نینگ اۉزیده ایران و پاکستاندن۲.۸میلیون مهاجر افغانستانگه قَیتریلگن.
تشکیلاتنینگ تأکیدلشیچه، بو عامهوي قَیتیشلر افغانستان اهالیسی نینگ کمیده۱۰ فایزگه آشیشیگه سبب بۉلگن و مملکتدهگی انسانپرورلیک بحراننی ینه-ده چوقورلشتیرگن.
