امریکا قۉشمه ایالتلری سنا مجلسی امریکا حربي حرکتلرینی ایرانگه قرشی دوام اېتتیریشنی چېکلاوچی قطعنامهنی معقولهدی.
مذکور قطعنامه بۉییچه آواز بېریش سهشنبه کونی (۲سرطان) بۉلیب اۉتدی.
تخمیناً اوچ هفته اوّل وکیللر مجلسی تامانیدن هم تصدیقلنگن قۉشمه قطعنامه۵۰ ته یاقلاوچی و۴۸ته قرشی آواز بیلن قبول قیلیندی.
بو قرار امریکا حکومتی و ایران اۉرتهسیده اوروشنی یکونلش بۉییچه کېلیشووگه اېریشیلگن همده یکوني تینچلیک بیتیمی یوزهسیدن مذاکرهلر دوام اېتهیاتگن بیر پیتده قبول قیلیندی.
دیموکراتلر تامانیدن تیارلنگن و اَیریم جمهوریتچیلر تامانیدن هم قۉللب-قوّتلنگن اوشبو قطعنامه اوّلراق اقش جمهور رییسی دونالد ترامپ نینگ کېسکین ناراضیلیگیگه سبب بۉلگن اېدی.
ترامپ مذکور حجتنی قۉللب-قوّتلهگن تۉرت نفر جمهوریتچی وکیلنی «یامان جمهوریتچیلر» دېب اتهب، اولر نینگ حرکتلرینی «وطنپرورلیککه ضد» دېب بهالهگن.
سببی، اوشبو قطعنامه امریکانینگ ایراندهگی حربي عملیاتلرینی دوام اېتتیریش اوچون کانگرس نینگ رخصتی و راضیلیگینی طلب قیلهدی.
امریکا نینگ «حماسی غضب» ناملی حربي عملیاتی ۲۸-فبروریدن ۴-اپرېلگچه دوام اېتگن اېدی.
شوندن کېین هم، صلح اعلان قیلینگنیگه قرهمهی، اَیریم دورلرده ایکّی تامان بیر-بیریگه قرشی هجوملر اویوشتیریشده دوام اېتگن.
بیراق اۉتگن هفته 14 مادّهدن عبارت کېلیشوو شرطنامه امضالنگچ، اونینگ نتیجهسیده هرمز بۉغازی قَیته آچیلیب، اېران نینگ دېنگیز قملی بېکار قیلینگنیدن سۉنگ، امریکا و ایران اۉرتهسیده ینگی حربي حرکتلر کوزهتیلمهدی.
ترامپ: سنانینگ آوازی معناسیز
دانهلد ترامپ سنا مجلسی تامانیدن اوشبو قطعنامه نینگ قبول قیلینیشینی «اېنگ ناقولهی پیتده اۉتکزیلگن معناسیز آواز بېریش» دېب اتهدی.
او سناتدهگی آواز بېریشدن بیر نېچه ساعت اۉتیب، اۉزی نینگ تروثسوشیال ترماغیده شوندهی یازدی:
«سنا اوروش وکالتلری تۉغریسیدهگی قانون بۉییچه عیناً اېنگ ناقولهی وقتده معناسیز آواز بېریشنی تنلهدی و شو آرقهلی دنیادهگی اېنگ ییریک تروریزم حاميسیگه اقش مېنینگ اولرگه قرشی قیلهیاتگن حرکتلریمدن ناراضی اېکنلیگی و مېن تۉختشیم کېرهکلیگی حقیدهگی سیگنالنی یوباردی.»
ترامپ نینگ تأکیدلشیچه، او ایراننی «تۉلیق باسیم آستیده و چېکینیشگه تیار» حالتگه کېلتیرگن همده تهران دېیرلی هر قندهی شرطگه راضی بۉلیشگه تیار اېدی.
امریکا جمهور رییسی سناتورلر اونینگ ایشینی «ینهده قیینلشتیرگنینی»، بیراق او اۉز مقصدیگه «هر قندهی یۉل بیلن» اېریشیشینی بیلدیردی.
