سرپل ولایتیده محلي اهالی تخمیناً۳۰۰ ییللیک تاریخگه اېگه بۉلگن یېتّی قدیمي بویومنی تاپیب، طالبلرنینگ اخبارات و مدنیت باشقرمهسیگه تاپشیردی.
طالبلرنینگ اخبارات و مدنیت وزیرلیگی بوگون (چهارشنبه، ۳-سرطان) ترقهتگن بیاناتیده اوشبو تاریخي اشیالر سرپل ولایتینینگ سنچارک اولسواللیگی، فرشقان قیشلاغیدن تاپیلگنینی معلوم قیلدی.
معلوماتلرگه کۉره، تخمیناً۳۰۰ ییللیک تاریخگه اېگه دېب بهالنهیاتگن بویوملر آرهسیده کیچیک قازانچه، چیراق تگلیگی، شمعدان، سینگن قازانچه، پیلیکدان، مایدان همده چۉمیچ دستهسینینگ ایکّی بۉلهگی بار.
طالبلرنینگ سرپلدهگی واليسی احمددشاه دیندوست اوشبو تاریخي بویوملرنینگ تاپیلیب، رسميلرگه تاپشیریلیشینی «یخشی تشبث» و «تاریخي میراثگه نسبتاً مسوولیت همده اعتبار نمونهسی» دېب بهالهگن.
سرپل اخبارات و مدنیت ریاستی باشلیغی عبدالغفور حقنما مذکور اشیالرنی قبول قیلیب آلر اېکن، «تاریخي یادگارلیکلرنی اسرهش و سقلش برچه اوچون عمومي ملي و اسلامي مسوولیت دیر»، دېگن.
بو بیاناتلر یانیده یونسکو سۉنگگی ییللرده طالبلر تامانیدن رۉیخطگه آلینگن تاریخي حدودلرده ناقانوني قزیش ایشلری، قوریلیشلر و نظارتسیز ارکیولوگیک فعالیت دوام اېتهیاتگنیدن بیر نېچه بار خواطر بیلدیرگن.
شونینگدېک، طالبلر ۲۰۰۱-ییلده باميان بودالری هیکللرینی پارتلهتیب یوباریب، افغانستاننینگ اېنگ مشهور تاریخي یادگارلیکلریدن بیرینی یۉق قیلگن اېدی.
