انسان حقلرینینگ جَنوبي آسیا بۉلیمی تدقیقاتچیسی فرشته عباسی، اروپا اتفاقیگه اعضا دولتلرنینگ طالبلر بیلن اوچرهشووینی آچیق ایکّی یوزلمهچیلیک و کتّه اویت دېب بهالهدی.
عباسی سهشنبه آقشامیده (۲-سرطان) ایکس اجتماعي ترماغیده نشر قیلگن بیاناتیده شوندهی دېدی: «بیر تاماندن طالبلرنینگ حقوقبوزرلیکلرینی قارهلب، باشقه تاماندن اولرگه بوندهی نفوذ و موقع بېریش همده تورلی مسألهلر بۉییچه کېلیشوولرگه اېریشیش آچیق ایکّی یوزلمهچیلیکدیر.»
اونینگ تأکیدلشیچه، اروپا دولتلرینینگ طالبلر بیلن مهاجرتنی نظارت قیلیش مسألهسینی محاکمه قیلیشی «کتّه اویت» حسابلنهدی.
کېچه اورپا کمیسیونی بروکسلده طالبلرنینگ بېش کیشیلیک هیئاتینی قبول قیلدی. هیئت افغانستان فقرالرینی دېپورت قیلیش مسألهلری یوزهسیدن مذاکرهلر آلیب باریش اوچون تشریف بویورگن اېدی.
اروپا کمیسیونی مطبوعات سۉزلاوچیلری عامهوي اخبارات واسطهلریگه اوشبو اوچرهشوو فقط افغانستان مهاجرلرینی دېپورت قیلیش بیلن باغلیق تخنیکي مسألهلرنی محاکمه قیلیش اوچون تشکیل اېتیلگنینی معلوم قیلدیلر.
کمیسیون وکیللریدن بیری مارکوس لمرتنینگ ایتیشیچه، اروپا دولتلری آغیر جنایتلر صادر اېتگن و اروپا خوفسیزلیگیگه تهدید دېب بهالنگن مهاجرلرنی چیقریب یوباریش تۉغریسیده قرار قبول قیلگن. بوندهی شخصلرنی افغانستانگه قَیتریش اوچون اېسه طالبلرنینگ راضیلیگی ضرور.
بیراق اروپا اتفاقینینگ طالبان بیلن علاقهلرینی تنقید قیلهیاتگنلر بو مناسبتلر طالبلرنینگ سیاسي لېگیتیملیگینی کوچهیتیریشینی و همکارلیک فقط تخنیکي مسألهلر دایرهسیده قالیب کېتمسلیگینی تأکیدلهماقده.
طالبلر تشقی ایشلر وزیرلیگی مطبوعات سۉزلاوچیسی عبدالقهار بلخي اېسه کېچه مذکور اوچرهشووده اروپادهگی افغانستان فقرالریگه قنسوللیک خدمتلرینی قَیته یۉلگه قۉییش، اۉز ارا ایشانچنی مستحکملش، افغانستان فقرالرینینگ معمالرینی حل اېتیش همده باشپناه سۉراولری رد اېتیلگن افغانلرنینگ وضعیتینی محاکمه قیلیش مسألهلری کۉریب چیقیلگنینی بیلدیردی.
طالبلر سۉزلاوچیسیگه کۉره، تامانلر اروپاده استقامت قیلهیاتگن افغانلر دوچ کېلهیاتگن معمالرنی کمهیتیریش و عملي یېچیملر تاپیش یوزهسیدن هم فکر المشگن.
