افغانستاننینگ کانبرادهگی اېلچیخانهسی آسترليا پارلمانیده «افغانستان خلقی بیلن دۉستلیک گروهی» تشکیل اېتیلگنینی معلوم قیلدی.
اېلچیخانه ترقهتگن بیاناتگه کۉره، مذکور پارلمان دۉستلیک گروهی نینگ قَیته تیکلنیش مراسمی سهشنبه کونی (۲-سرطان) بۉلیب اۉتگن.
بیاناتده قید اېتیلیشیچه، افغانستانده قانوني و خلقارا مقیاسده تن آلینگن سیاسي تیزیم موجود اېمسلیگی سببلی، اوشبو توزیلمه «افغانستان بیلن پارلمان دۉستلیک گروهی» اېمس، بلکه «افغانستان خلقی بیلن پارلمان دۉستلیک گروهی» نامی آستیده فعالیت باشلهگن.
کانبرادهگی افغانستان اېلچیخانهسی مذکور تشبثنی آلقیشلب، اونی آسترليانینگ افغانستان خلقیگه نسبتاً دۉستلیگی، بیردملیگی و صداقتی دوام اېتهیاتگنی نینگ مهم بېلگیسی دېب بهالهدی.
اوشبو پارلمان گروهی آسترليا پارلمانی اعضاسی و مدنی ایشلری وزیری جولیان هیل رهبرلیگیده فعالیت یوریتهدی.
آسترلیا پارلمانی باشلیغی میلتون دیک آچیلیش مراسمیده سۉزگه چیقیب، آسترليا افغانستان خلقیگه نسبتاً اۉز مجبوريتلریگه صادق قالیشینی تأکیدلهدی.
اونینگ ایتیشیچه، آسترليا پارلمانینینگ افغانستان خلقی بیلن بیردملیگی بوندن کېین هم دوام اېتهدی.
آسترليا تشقی ایشلر وزیری اۉرینباسری مت تسلویت افغانستاندهگی انسان حقوقلری وضعیتیگه تۉختهلیب، شوندهی دېدی:
«بیز افغانستاندهگی بوگونگی وضعیت نینگ ینگی عادتي حالتگه ایلنیشیگه یۉل قۉیمهیمیز.»
او آسترليا نینگ افغانستان خلقیگه کۉرسهتهیاتگن انسانپرورلیک یاردمی دوام اېتیشینی، شونینگدېک، عیاللر و قیزلر حقوقلرینی قۉللب-قوّتلش همده انسان حقوقلری بوزیلیشلری یوزهسیدن طالباننی جوابگرلیککه تارتیش بۉییچه سعی-حرکتلر دوام اېتتیریلیشینی بیلدیردی.
دۉستلیک گروهی نینگ مشترک رییسی مونیک رایان هم آسترليا خلقی، اینیقسه عیاللر، افغانستان عیاللری و قیزلرینی قۉللب-قوّتلشده دوام اېتیشینی تأکیدلهدی.
افغانستان نینگ کانبرادهگی اېلچیسی وحیدالله ویسی اېسه افغانستان خلقیگه یاردم کۉرسهتیش طالبان سیاستینی معقوللش بیلن تېنگلشتیریلمسلیگی کېرهکلیگینی ایتدی.
اونینگ تأکیدلشیچه، افغانستان خلقی و طالبان ایکّی علیحده توشونچه بۉلیب، خلققه یاردم بېریش طالبان سیاستینی قۉللب-قوّتلش دېگنی اېمس.
اېلچی شوندهی دېدی: انسانپرورلیک یاردمی طالباننی تن آلیشنی طلب قیلمهیدی و موجود وضعیتنی عادتيلشتیریش صفتیده تلقین اېتیلمسلیگی کېرهک.»
«افغانستان بیلن پارلمان دۉستلیک گروهی» اوّل هم موجود بۉلگن. بیراق افغانستانده جمهوریت توزومی قولهگنی و پارلمان فعالیتی توگهتیلگنیدن سۉنگ، بو سفر گروه «افغانستان خلقی بیلن دۉستلیک گروهی» نامی آستیده قَیته تشکیل اېتیلدی.
آسترلیا افغانستان اېلچیخانهسینی حاضرگچه طالبانگه تاپشیرمهگن و طالبان بیلن رسمي همده آچیق دیپلوماتیک علاقهلر اۉرنهتمهگن دولتلردن بیری حسابلنهدی.
