طالبلرنینگ هرات ولایتی امنیه قوماندانلیگی مرکزي شهرده بیر یاش ییگیت اۉز موترینینگ اۉغیرلنیشی نینگ آلدینی آلیشگه اورینگن پیتده قوراللی شخص تامانیدن اۉلدیریلگنینی معلوم قیلدی.
طالبلر امنیه قوماندانلیگی مطبوعات سۉزلاوچیسی سید مسعود حسینی بوگون (چهارشنبه، ۳-سرطان) بېرگن معلوماتیگه کۉره، حادثه تخمیناً سکّیز کون اوّل هرات شهرینینگ تۉرتینچی خوفسیزلیک حوزهسیده یوز بېرگن.
اونینگ ایتیشیچه، قوراللنگن اۉغری مقتولنینگ موتریگه اۉتیریب، اوندن موترنی تاپشیریشنی طلب قیلگن. بیراق ییگیت موترنی بېریشدن باش تارتگنیدن سۉنگ، گماندار اونگه قرهته اۉق اوزگن و نتیجهده او واقعه جاییده جان بېرگن.
سۉزلاوچینینگ سۉزلریگه کۉره، قاتللیکده گمان قیلینهیاتگن شخص انیقلنیب، قۉلگه آلینگن.
رسميلر حاضرچه هلاک بۉلگن ییگیت همده گمانلنووچینینگ شخصیگه عاید معلوماتلرنی آشکار قیلمهگن.
سۉنگگی آیلرده مملکتنینگ تورلی شهرلریده قوراللی تالانچیلیک و اۉغیرلیک حالتلری سېزیلرلی درجهده کۉپهییب، اهالی آرهسیده خواطر اویغاتماقده.
بو حادثهلر طالبلر مملکت بۉیلب تۉلیق امنیت تأمینلنگنینی ادعا قیلهیاتگن بیر پیتده یوز بېرماقده.
