تمدن تلویزیونی اۉزینینگ رسمي فیسبوک صحیفهسیده نامعلوم شخصلر یوک تشووچی ترانسپورت واسطهلری یاردمیده تلویزیوننینگ جهازلری، اسکونهلری و باشقه ملکلرینی کابلدهگی مرکزي بناسیدن آلیب چیقهیاتگنینی معلوم قیلدی.
تلویزیون بوگون (چهارشنبه، ۳- سرطان) اعلان قیلگن بیاناتیده شوندهی دېدی: « صلاحیتلی محکمه تامانیدن یکوني و قطعي حکم چیقریلمهگونچه، اوشبو عامهوي اخبارات واسطهسینینگ ملک و جهازلرینی اېگهللش، کۉچیریش، آلیب چیقیش یاکه اولرگه هر قندهی طرزده ارهلشیش قانوني اساسگه اېگه اېمس همده اۉزگهنینگ ملکیگه ناقانوني اېگهلیک قیلیش حسابلنهدی.»
تلویزیوننینگ تأکیدلشیچه، مذکور بناده خصوصي تورر جایلر هم موجود بۉلیب، او یېرده یشاوچی فقرالرنینگ ملکي حقوقلری قانون اساسیده حرمت قیلینیشی و حمایه اېتیلیشی کېرهک.
تمدن تلویزیون بناسی، جهازلری و ملکلرینی حمایه قیلیش همده خوفسیزلیگینی تأمینلش مسوولیتی تېگیشلی خوفسیزلیک اۉرگانلری و امیرلیک مؤسهلری ذمّهسیده اېکنینی قید اېتدی.
بیاناتده ینه شوندهی دېییلهدی: «اگر تلویزیون یاکه بناده جایلشگن شخصي ملکلرگه ضرر یېتکزیلسه، اولر یۉقالسه، ناقانوني روشده آلیب چیقیلسه یاکه باشقه توردهگی تلفات یوز بېرسه، بونینگ حقوقي و قانوني جوابگرلیگی مسوول ادارهلر ذمّهسیده بۉلهدی.»
تیناوون توش پیتی، ساعت تخمینا۱۲:۰۲ده طالبان عدلیه وزیرلیگیگه علاقهدار کوچلر کابلدهگی تمدن تلویزیونینینگ مرکزي دفتریگه باستیریب کیرگن و اونینگ نشرات فعالیتینی تۉختهتگن اېدی.
کېینچهلیک تلویزیون رهبری محمد جواد محسنینینگ معلوم قیلیشیچه، طالبلرنینگ تلویزیون بناسیگه باستیریب کیریشی بنا دولت یېریده قوریلگنی حقیدهگی دعوا بیلن باغلیق محکمه ایشی سببلی یوز بېرگن.
اونینگ سۉزلریگه کۉره، مذکور ایش مخصوص محکمهگه تاپشیریلگن بۉلیب، محکمه حلی یکوني قرارینی چیقرمهگن.
تمدن تلویزیونی ۱۳۸۵-هجري-شمسي ییلده تنیقلی افغانستانلیک شیعه مذهبی رهبری محمد آصف محسنی تامانیدن تشکیل اېتیلگن. تلویزیون اساسن مدني، سیاسي، دیني و کۉنگیلآچر دستورلرنی نشراتگه اوزهتیب کېلگن.
طالبان ۱۴۰۳-هجري-شمسي ییلده هم اوشبو تلویزیون فعالیتینی «حرکت اسلامي» حزبیگه سیاسي یقینلیک و «غضب قیلینگن یېرده فعالیت یوریتیش» عیبلاولری بیلن وقتینچه تۉختهتگن اېدی.
