پاکستان تشقی ایشلر وزیرلیگی سۉزلاوچیسی طاهر اندرابینینگ ایتیشیچه، پاکستان و چین افغانستاندن کېلهیاتگن عمومي خوفسیزلیک تهدیدلریگه دوچ کېلماقده و شو سببلی ایکّی دولت افغانستان مسألهسیده یقین همکارلیکنی دوام اېتتیرماقده.
پاکستان تشقی ایشلر وزیرلیگی سۉزلاوچیسی بوگون (چهارشنبه، ۳-سرطان) اسلام آبادده اۉتکزیلگن مطبوعات انجمنیده پاکستان تحریک طالبان پاکستان (تیتیپی) تهدیدیگه، چین اېسه شرقی تورکستان اسلامی حرکتی تهدیدیگه دوچ کېلهیاتگنینی تأکیدلهدی.
اونینگ سۉزلریگه کۉره، عیناً شو سببلی افغانستان بیلن باغلیق مسألهلرده پاکستان و چین اۉرتهسیدهگی همکارلیک دوام اېتهدی.
اندرابی شوندهی دېدی: «بیز چیننینگ منطقوي خوفسیزلیک مسألهلریدهگی، جملهدن افغانستان بیلن باغلیق ایجابي رۉلینی اعتراف اېتهمیز. شو باعث چین بیلن همکارلیکنی دوام اېتتیرهمیز و اونینگ منطقهدهگی ایجابي سعی-حرکتلری قندهی رواجلنهیاتگنینی بیرگهلیکده محاکمه قیلهمیز.»
پاکستان رسميلری بیر نېچه بار تیتیپی و باشقه قوراللی گروهلر، جملهدن چین تامانیدن ترورچی تشکیلات دېب حسابلنهدیگن شرقی تورکستان اسلامی حرکتی اعضالری افغانستان توپراغیده فعالیت یوریتهیاتگنینی همده قۉشنی دولتلر، منطقه و خلقارا خوفسیزلیککه تهدید سالهیاتگنینی دعوا قیلیب کېلماقده.
بیراق طالبلر بو عیبلاولرنی رد اېتیب، افغانستانده ترورچی گروهلر، جملهدن تیتیپی موجود اېمسلیگینی تأکیدلهیدی. طالبان رسمیلری افغانستان توپراغیدن باشقه دولتلرگه قرشی فایدهلنیشگه هېچ بیر گروهگه رخصت بېریلمسلیگینی بیلدیریب کېلماقده.
تیتیپی نینگ افغانستاندهگی موجودلیگی مسألهسی سۉنگگی بیر ییل ایچیده طالبان و پاکستان اۉرتهسیدهگی کېسکینلیکنی کوچهیتیریب، کمیده ایکّی مرته قوراللی تۉقنهشوولرگه سبب بۉلگن.
مذکور ماجرالر دوامیده افغانستان نینگ تورلی ولایتلری، جملهدن پایتخت کابل هم پاکستان تامانیدن اویوشتیریلگن هوا و راکت هجوملری نشانیگه ایلنگن.
اۉتگن ییل نینگ اکتوبر آییده یوز بېرگن ایلک ییریک تۉقنهشوودن سۉنگ پاکستان افغانستان بیلن برچه چېگره اۉتیش پونکتلرینی یاپدی. حاضرگی وقتده ایکّی مملکت اۉرتهسیدهگی قوروقلیک سوداسی، ترانزیت قتناولری و فقرالر حرکتی دېیرلی تۉختهب قالگن.
