افغانستاننینگ بیرلشگن ملتلر تشکیلاتیدهگی نمایندهلیگی سرپرستی نصیر احمد فایق طالبلر نمایندهلرینینگ بروکسلگه سفری یوزهسیدن مناسبت بیلدیریب، میلیونلب افغانستان عیاللری و قیزلری اېنگ اساسي حقوق همده اېرکینلیکلردن محروم اېتیلگن بیر پیتده طالبلر بیلن همکارلیک قیلیش، اونی قۉللب-قوّتلش یاکه مناسبتلرنی عادتيلشتیریشنی هېچ بیر دولت و شخص آقلهی آلمهسلیگینی تأکیدلهدی.
فایق بوگون (چهارشنبه، ۳-سرطان) ایکس اجتماعي ترماغیده اعلان قیلگن بیاناتیده شوندهی یازدی: «طالبلرگه مشروعیت بېریلیشیگه قرشی توریش-افغانستان خلقی تامانیده توریش دېمک دیر.»
اونینگ تأکیدلشیچه، طالبل نه افغانستان مدنیتی نینگ، نه اسلام نینگ یوکسک قدریتلری نینگ وکیلی حسابلنهدی.
فایق شوندهی دېدی: «طالبلرنینگ عیاللر و افغانستان خلقیگه نسبتاً آلیب بارهیاتگن سیاستی مملکت تاریخیدهگی قاره داغ، جهالت، اېکسترېمیزم و ظلمنینگ یقّال تمثالی دیر.»
افغانستاننینگ بیرلشگن ملتلر تشکیلاتیدهگی نمایندهسی شونینگدېک اروپا پارلمان اعضالریگه، خصوصاً روشل گارسیا همده افغانستان عیاللری و خلقینی قۉللب-قوّتلب، انسان حقوقلرینی تیزیملی روشده بوزهیاتگن و جمعیتنینگ یرمینی جماعت حیاتیدن چېتلهتگن توزوم بیلن مناسبتلرنی عادتيلشتیریشگه قرشی آواز کۉترهیاتگن برچه شخصلرگه منّتدارلیک بیلدیردی.
طالبلرنینگ بیر هیئاتی اروپا کمیسیونی تکلیفیگه بناءً تیناوون بروکسلگه تشریف بویوریب، اروپا رسميلری بیلن افغانستان مهاجرلرینی افغانستانگه دېپورت قیلیش مسألهلرینی بحث قیلگن اېدی.
مذکور تشریف افغانستان فقرالری و اروپا پارلمانی اعضالری آرهسیده کېنگ تنقیدلرگه سبب بۉلدی.
سفردن سۉنگ اروپا پارلمانی اعضاسی روشل گارسیا افغانستان خلقیدن طالبلر هیئاتینینگ بروکسلگه کېلیشیگه تۉسقینلیک قیله آلمهگنی اوچون عذر سۉرهدی.
ینه بیر اروپا پارلمانی اعضاسی هانا نیومن اېسه طالبان وکیللرینینگ بروکسلگه سفرینی «اویتلی حالت» دېب اتهب، بوندهی تشریفلر طالباننی خلقارا میدانده عادتي و مقبول سیاسي کوچ صفتیده کۉرسهتیشگه خدمت قیلیشینی ینه بیر بار تأکیدلهدی.
