ننگرهار ولایتیده بیر گروه یاشلر دریالرده چۉکیب کېتیش حالتلری نینگ آلدینی آلیش مقصدیده خبردارلیک کمپاینینی یۉلگه قۉیدی.
مذکور کمپاین «ایسّیق سیزنی اۉلدیرمهیدی، اما دریا اۉلدیرهدی» شعاری آستیده تشکیل اېتیلگن.
کمپاین فعاللریدن بیری حبیب امیری «اطلاعات روز»گه شوندهی دېدی: «مقصد یاشلر و بالهلرنی دریالرده سوزیشدن قَیتریشدیر.»
اونینگ ایتیشیچه، بیر گروه کۉنگیللی یاشلر دریالر بۉیلب حرکتلنیب، «ایسّیق سیزنی اۉلدیرمهیدی، اما دریا اۉلدیرهدی» شعاری آرقهلی آدملرنی سوزیشدن آگاهلنتیرماقده.
امیری کمپاین ننگرهاردهگی دریالرده یاشلر و بالهلرنینگ چۉکیب کېتیش حالتلری کۉپهیگنی سببلی باشلنگنینی تأکیدلهدی.
او شوندهی دېدی: «ننگرهارده هوا ایسیشی بیلن دېیرلی هر کونی بیر یاش یاکه باله نینگ دریاده چۉکیب کېتگنی حقیدهگی خبرلرنی اېشیتهمیز و اجتماعي ترماقلرده اولر حقیده قیغولی خبرلرنی کۉرهمیز.»
امیری نینگ سۉزلریگه کۉره، کمپاین نینگ یگانه مقصدی یاشلرنی دریالرده سوزیش خوفیدن آگاهلنتیریش و اولرنی بوندهی جایلرده چۉمِیلیشدن تيیلیش ضرورلیگیگه ایشانتیریشدیر.
اونینگ ایتیشیچه، اکثریت یاشلر بو تشبثنی قۉللب-قوّتلهیدی، بیراق اَیریملر بونگه قۉشیلمهیدی.
امیری هر ییلی هوا ایسیشی بیلن باشقه یاشلر یاردمیده اوشبو کمپایننی قَیته باشلشینی، اما اَیریم آدملر اولرنی مسخره قیلیشینی یاکه چۉکیب کېتیش خوفینی عادي حال دېب قبول قیلیشینی ایتدی.
شونگه قرهمهی، کمپاین اشتراکچیلری کنر و درونته یقینیدهگی کابل دریاسی قیرغاقلری، ننگرهار کانالی و جلال آباد شهری اطرافیده یوریب، یاشلرنی دریالرگه سکرهمسلیک و سوزمسلیککه چقیرماقده.
بو یاشلر طالبان حکومتیدن دریالر بۉییده گیزمه لر کوچهیتیریشنی و شو آرقهلی آدملرنینگ چۉکیب کېتیشی نینگ آلدینی آلیشنی سۉرهماقده.
بو آرهده ننگرهار اخبارات و مدنیت ادارهسی معلوماتیگه کۉره، فقط اۉتگن بیر آی دوامیده ولایت نینگ تورلی حدودلریده سوزیش وقتیده 20 نفر یاش چۉکیب کېتگن.
هوا حرارتی نینگ کۉتریلیشی بیلن، ستندرد سوزیش حوزهلری یېتیشمسلیگی سببلی، کۉپلب یاشلر و اۉسمیرلر سلقینلشیش و دَم آلیش اوچون تېز آقیملی دریالر همده سوو انبارلریگه باریشماقده. متخصصلر اېسه بوندهی جایلرنی خوفلی دېب حسابلهیدی.
طبيعي آفتلرگه قرشی کورهشگه تیارگرلیک ادارهسی اوّلراق جاري هجري-شمسي ییل نینگ دستلبکی ایکّی یریم آییده 75 نفر باله و یاش سووده چۉکیب هلاک بۉلگنینی معلوم قیلگن اېدی. بو اېسه اۉرتهچه هر کونی بیر کیشی نینگ چۉکیب وفات اېتگنینی انگلهتهدی.
