باميان ولایتیدهگی محلي منبعلرنینگ ایتیشیچه، قوراللنگن کۉچمنچیلر (کۉچیلر) اوشبو ولایت نینگ پنجاب اولسواللیگیدهگی بیر نېچه قیشلاق ییلاولریگه باستیریب کیرگنیدن سۉنگ، محلي اهالیگه بو حدودلرگه اۉزبیلرمانلیک بیلن کېلمهگنلیکلرینی، بلکه طالبلر رهبری هبتالله آخوندزاده همده گروه نینگ چېگره ایشلری، قبیلهلر و اېلتلر وزیرلیگیدن «ییلاولردن فایدهلنیش بویروغی» آلگنلیکلرینی ایتگن.
منبعلرگه کۉره، کۉچمنچیلر تیناوون (چهارشنبه، ۳-سرطان) پنجاب اولسواللیگی نینگ «قلعچه کیرمان»، »کرول»، «پای کوتل جمالي» و «سرخ نوکر دوله» قیشلاقلریگه کیریب کېلیب، قریب ۲۵ته پادهنی محلي اهالی نینگ ییلاولریگه قۉییب یوبارگن.
منبعلرنینگ ایتیشیچه، محلي اهالی نینگ اعتراضیگه جوابن کۉچمنچیلر طالبلر رهبری اولرگه: «هزارهجات ییلاولری دولت ملکی حسابلنهدی، بارینگلر و پادهلرینگیزنی باقینگلر»، دېب کۉرسهتمه بېرگنینی دعوا قیلگن.
خبرلرگه کۉره، مذکور قیشلاقلرنینگ ۵۱ گه یقین آقسقاللری و یاش اولوغ کیشیلری کۉچمنچیلرنینگ چادرلریگه باریب، ییلاولر محلي اهالی نینگ شخصي ملکی اېکنینی و اولر حدودنی ترک اېتیشلری کېرهکلیگینی ایتگن. بیراق کۉچمنچیلر اولرنی تهدید قیلیب: «بیزده حتا اۉق اوزیش بویروغی هم بار»، دېگن.
منبعلرنینگ بیلدیریشیچه، کۉچمنچیلر جملهدن کېچه تونده کرول قیشلاغیدن تۉقّیز نفر محلي اهالینی اۉزلری بیلن آلیب کېتیب، اولرنی یکاولنگ یاکه باميان مرکزیگه آلیب باریشلرینی ایتگن.
شونینگدېک، ایکّی کون اوّل «سرخ قلعه» قیشلاغیده کۉچمنچیلر عوض اسملی شخص و اونینگ اوکهسینی کلتکلهگن. حاضر اولر باميان ولایت کسلخانهسیده دوالنماقده.
منبعلرگه کۉره، ییلاولرگه باستیریب کیریش محلي اهالی نینگ جدّي خواطریگه سبب بۉلگن. اگر بو حالت دوام اېتسه، اولر چاروالری اوچون قیش موسمیگه یېترلی آزوقه ذخیرهسینی تیارلهی آلمهیدی.
قوراللنگن کۉچمنچیلر جاري هجري-شمسي ییل دوامیده باميان نینگ پنجاب تومنیدهگی تورلی قیشلاقلرگه بیر نېچه بار باستیریب کیریب، پادهلرینی محلي اهالی نینگ اېکین میدانلری و ییلاولریگه قۉییب یوبارگن. محلي اهالی قرشیلیک کۉرسهتگن حاللرده اېسه اولر کلتکلنگن و تهدید قیلینگن.
شوندن سۉنگ طالبلرنینگ چېگره ایشلری، قبیلهلر و اېلتلر وزیرلیگی ۲۶-جوزا کونی پنجاب تومنیدهگی کۉچمنچیلر و محلي اهالی اۉرتهسیدهگی کېلیشماوچیلیک مذاکرهلر آرقهلی حل اېتیلگنینی معلوم قیلگن اېدی. اما معما نینگ قندهی حل قیلینگنی حقیده تفصیلات بېریلمهگن.
عینِ پیتده پنجاب تومنیدهگی بیر محلي منبع «اطلاعات روز» گزېتهسیگه طالبان یوبارگن هیئت کۉچمنچیلرگه چاروالری بیلن تومننی امکان قدَر تېزراق ترک اېتیشنی بویورگنینی، بیراق اولر ینه بېش کون مهلت سۉرهگنینی و طالبان هیئتی بو طلبگه راضی بۉلگنینی ایتگن.
بیراق ینگی خبرلر کۉچمنچیلرنینگ ینه محلي اهالی ییلاولریگه باستیریب کیرگنینی کۉرسهتماقده. بو اېسه اولر نهفقط اوّلگی کېلیشووگه عمل قیلمهگنینی، بلکه اېندیلیکده طالبان رهبری و وزیرلیکدن «ییلاولردن فایدهلنیش بویروغی» آلگنینی دعوا قیلهیاتگنینی انگلهتهدی.
هر ییلی یاز موسمی کېلیشی بیلن کۉچمنچیلر چاروالری بیلن افغانستاننینگ مرکزي حدودلریگه کیریب بارهدی. محلي اهالی وکیللری نینگ ایتیشیچه، اولر کۉپینچه اهالیگه باسیم اۉتکزهدی و تورلی معمالرنی کېلتیریب چیقرهدی.
طالبلر افغانستانده حاکمیتنی قَیته اېگهلهگنیدن سۉنگ کۉچمنچیلرنینگ مرکزي حدودلرگه کیریب باریشی ینه-ده کوچهیگن و بو محلي اهالی اوچون جدّي معماگه ایلنگن.
محلي منبعلرگه کۉره، کۉچمنچیلر مرکزي افغانستاندهگی اېکین میدانلری و ییلاولرگه ضرر یېتکزیشدن تشقری، شو پیتگچه بیر نېچه محلي اهالینی هم اۉلدیرگن.
