نورستاندهگی محلي منبعلرنینگ ایتیشیچه، ولایتنینگ واما اولسواللیگیده بیر یاش ییگیت سووده چۉمِیلهیاتگن پیتده چۉکیب هلاک بۉلگن.
منبعلرگه کۉره، اوشبو ییگیت بوگون (پنجشنبه، 4-سرطان) توشدن کېین واما اولسواللیگینینگ ننگری حدودیدهگی دریاده چۉمِیلهیاتگن وقتیده چۉکیب کېتگن.
منبعلرنینگ بیلدیریشیچه، ییگیت نینگ جسدی حاضرچه تاپیلمهگن و اونینگ عایله اعضالری دریا اطرافیدهگی آدملردن جسدنی قیدیریشده یاردم بېریشنی سۉرهگن.
معلوماتلرگه کۉره، اولگن کیشی طالبلرنینگ نورستاندهگی کریکت کېنگشی باشلیغی یحی اسد نورستانينینگ اوکهسی بۉلگن.
جاري هجري-شمسي ییل دوامیده مملکت نینگ تورلی حدودلریده دریالر و سوو انبارلریده چۉمِیلیش وقتیده یاشلرنینگ چۉکیب هلاک بۉلیشی بیلن باغلیق کۉپلب حالتلر قید اېتیلگن.
طالبلرنینگ طبيعي آفتلرگه قرشی کورهش ادارهسی 18-جوزا کونی جاري ییل نینگ دستلبکی ایکّی یریم آییده مملکت بۉیلب 75 کیشی سووده چۉکیب وفات اېتگنینی معلوم قیلگن اېدی. شوندن کېین هم چۉکیش عاقبتیده هلاک بۉلیش حالتلری حقیده کۉپلب خبرلر ترقهلگن.
عینِ پیتده ننگرهار ولایتیده بیر گروه یاشلر دریالر و سوو انبارلریده چۉکیب کېتیش حالتلری نینگ آلدینی آلیش مقصدیده «ایسّیق سیزنی اۉلدیرمهیدی، اما دریا اۉلدیرهدی» شعاری آستیده کمپاین یۉلگه قۉیگن.
