کابل، 4-سرطان (پنجشنبه) کابلدهگی خاتم النبیین علمي مرکزی طالبلرنینگ عدلیه وزیرلیگی اوشبو مرکزگه قرهشلی مسجد، حسینیه، کتابخانه، اېرککلر مدرسهسی و قیزلر مدرسهسینی یاپیب، مُهرلب قۉیگنینی معلوم قیلدی.
هیئت بیاناتیده ایتیلیشیچه، مذکور ملک یوزهسیدن بحثلی ایش حاضرچه مخصوص محکمهده کۉریب چیقیلماقده و صلاحیتلی محکمه تامانیدن حلی یکوني همده قطعي حکم چیقریلمهگن. شونگه قرهمهی، طالبلرنینگ بو حرکتی “شاشمه-شاشرلیک بیلن عملگه آشیریلگن و مملکت دیني همده علمي جماعتچیلیگی کوتگن یاندشووگه ضد” دېب بهالنگن.
بیاناتده تأکیدلنیشیچه، خاتم النبیین علمي مرکزی کۉپ ییللردن بویان دیني تعلیم، علمالر تیارلش، اسلامي معرفتنی ترغیب قیلیش و افغانستان خلقیگه خدمت قیلیب کېلماقده. مرکز قانوني حجتلر، شرعي سندلر و ملک حقوقینی تصدیقلاوچی رسمي حجتلر اساسیده تشکیل اېتیلگن بۉلیب، هېچ قچان سیاسي حزبلرگه علاقهدار بۉلمهگن.
وصيلر هیئتی مرکزگه نسبتاً ایلگری سوریلگن برچه دعوالر عینِ پیتده مخصوص محکمه تامانیدن کۉریب چیقیلهیاتگنینی اېسلهتیب، یکوني قرارنی فقط محکمه چیقریشی لازملیگینی بیلدیردی.
بیاناتده ینه شوندهی دېییلهدی: “شریعت اساسیده باشقریلهیاتگن مملکتده دیني مکتبلر، مسجدلر، حسینیهلر و اسلامي تعلیم مسکنلری اېنگ اوّلا قۉللب-قوّتلنیشی و حمایه قیلینیشی کېرهک. محکمه نینگ یکوني قراریسیز بوندهی مرکزلر فعالیتی نینگ تۉختهتیلیشی استاذلر، طلبهلر و اولرنینگ عایلهلرینی تشویشگه سالماقده همده علمالر و دیندار خلق آرهسیده کېنگ ناراضیلیک اویغاتماقده.”
هیئت نینگ فکریچه، افغانستان مسلمانلری طالباندن دیني و علمي مرکزلرنی قۉللب-قوّتلشنی همده اولرنینگ تعلیمي و دیني فعالیتینی دوام اېتتیریش اوچون شرایط یرهتیشنی کوتماقده. اولرنینگ تأکیدلشیچه، عیبلاولر اثباتلنیب، محکمه حکمی چیقمهگونچه بوندهی مرکزلر نینگ فعالیتینی تۉختهتیش شریعتدهگی علم و دیني مسکنلرنینگ یوکسک مقامیگه ماس کېلمهیدی.
شو باعث وصيلر هیئتی طالبان رهبریتیدن مرکزگه قۉییلگن مُهرنی امکان قدَر تېزراق آلیب تشلشنی و محکمه نینگ یکوني قراریگه قدَر علمي، تعلیمي، دیني همده مدني فعالیتنی دوام اېتتیریشگه رخصت بېریشنی سۉردی.
بوندن تشقری، اولر عدالتنی تأمینلش مقصدیده خاتم النبیین علمي مرکزی و اونگه علاقهدار مؤسسهلرنینگ ملک حجتلری، شرعي سندلری همده قانوني حجتلرینی تېکشیرهدیگن مستقل و ایشانچلی کمیسیون توزیشنی تکلیف قیلدی.
هیئت طالبان مسووللری عدالتنی تأمینلش، اسلامي قدریتلرنی حمایه قیلیش و دیني-علمي مرکزلرنی قۉللب-قوّتلش مقصدیده ضرور چارهلرنی کۉریشیگه امید بیلدیردی.
مذکور واقعه خصوصي تمدن تلویزیونی نشراتی تۉختهتیلگنیدن بیر کون اۉتیب صادر بۉلدی. کېچه طالبان عدلیه وزیرلیگیگه قرهشلی کوچلر تلویزیون نینگ مرکزي بناسیگه باستیریب کیریب، نشرات نی تۉختهتگن و بنانی مُهرلهگن اېدی.
کېینچهلیک تمدن تلویزیونی باشلیغی محمد جواد محسني بو حرکت تلویزیون بناسی دولت یېریده قوریلگنی حقیدهگی دعوا بیلن باغلیقلیگینی ایتدی. اونینگ تأکیدلشیچه، مذکور ایش هم مخصوص محکمهده کۉریب چیقیلماقده و حلی یکوني حکم چیقریلمهگن.
تمدن تلویزیونی، خاتم النبیین علمي مرکزی و خاتم النبیین یونیورسیتیی مرحوم شیعه دیني اربابی آیتالله محمد آصف محسني تامانیدن اساس سالینگن اۉزارا باغلیق مؤسسهلردیر.
طالبان 1403-هجري قویاش ییلیده اوشبو اوچ مؤسسه دولت یېریده قوریلگنینی دعوا قیلگن اېدی. بیراق اولر نینگ مسووللری یېرگه اېگهلیکنی تصدیقلاوچی شرعي و قانوني حجتلرگه اېگه اېکنلیکلرینی، یېر دولت ملکی اېمسلیگینی تأکیدلب کېلماقده.
مسووللرنینگ ایتیشیچه، مذکور ایش بۉییچه مخصوص محکمه هنوز تېکشیروو آلیب بارماقده و یکوني قرار اعلان قیلینمهگن. شونگه قرهمهی، طالبان عدلیه وزیرلیگی ینه بیر بار اوشبو مؤسسهلر فعالیتینی تۉختهتیب، اولرنی مُهرلش چارهلرینی عملگه آشیردی.
