بیرلشگن ملتلر تشکیلاتی نینگ گیاهوند مادّهلر و جنایتچیلیک بۉییچه باشقرمهسی ینگی گزارشیده افغانستاندهگی موجود تریاک ذخیرهلری تخمیناً ۲۰۲۶-ییل آخریگچه یېتیشی ممکنلیگینی معلوم قیلدی.
حساباتدهگی اوشبو بهالش افغانستانده تریاک یېتیشتیریش تعقیقلنیشیدن آلدینگی و کېینگی دورلردهگی مخدر مادّهلر استعمالی حجمی اساسیده عملگه آشیریلگن.
جمعه کونی (۵-سرطان) اعلان قیلینگن حساباتگه کۉره، ۲۰۲۵-ییل آخریدن باشلب افغانستاندهگی اېرککلر آرهسیده قید اېتیلگن گیاهوند مادّهلر استعمالی معلوماتلری استعمال عادتلریده اۉزگریش یوز بېرگنینی کۉرستماقده.
حساباتده قید اېتیلیشیچه، ۲۰۲۵-ییلدن باشلب تریاک و هروئین کبی ناقانوني مخدر مادهلرنی استعمال قیلووچیلر سانی طبي دارولر و تینچلنتیرووچی دارولرنی استعمال قیلووچیلردن کم بۉلگن. بو اېسه سۉنگگی ییللرده تریاک و هروئینگه کیریش امکانیتی قیسقرگنینی انگلهتیشی ممکن.
بیرلشگن ملتلر تشکیلاتی معلوماتیگه کۉره، هروئین نینگ اساسي بازارلری همان تأمینات چېکلاولریگه دوچ کېلماقده و اَیریم بازارلرده محصولات تنقیصلیگی باشقهلریگه قرهگنده اېرتهراق یوزهگه کېلیشی ممکن.
حساباتده سۉنگگی ییللرده هروئیننینگ اولگورجی و چکنه بازارلردهگی نرخی آشگنی، صافلیگی اېسه کمهیگنی تأمینات زنجیریده جدّي اوزیلیشلر موجودلیگینی کۉرسهتیشی قید اېتیلگن.
معلوماتلرگه کۉره، ۲۰۲۳–۲۰۲۴-ییللرده۱۲ ته بازارده افغانستان نینگ صاف هروئینی چکنه نرخی هر گرام اوچون تخمیناً۲۵۰ امریکا دالریدن۵۰۰ امریکا دالریگچه کۉتریلگن.
بیرلشگن ملتلر تشکیلاتی اَیریم ساغلیقنی سقلش کۉرستکیچلری هم هروئین استعمالی کمهیهیاتگنینی کۉرسهتهیاتگنینی بیلدیرگن.
جملهدن، ۲۰۲۴-ییل بۉییچه معلومات تقدیم اېتگن۱۹ دولت نینگ۱۷ تهسیده هروئین قرهملیگینی دوالش اوچون مراجعتلر سانی کمهیگن. گرچه اوشبو معلوماتلر چېکلنگن بۉلسه-ده، اولر اَیریم بازارلرده هروئین استعمالی پهسهیهیاتگنیدن دلالت بېریشی ممکن.
افغانستان اطرافیدهگی دولتلرگه کۉکناری اېکینلری کۉچماقده
بیرلشگن ملتلر تشکیلاتی حساباتیگه کۉره، کۉکنار اېکینلرینینگ بیر قِسمی افغانستانگه قۉشنی دولتلرگه کۉچگن بۉلیشی احتمالدن خالی اېمس.
حساباتده ایتیلیشیچه، افغانستانده قوروق افیون نینگ اولگورجی نرخی اۉتگن ییلی بیر کیلوگرام اوچون ۸۰۰ امریکا دالریدن۶۰۰ امریکا دالریگچه توشگن. بو اېسه افیون یېتیشتیریش تعقیقلنگنیدن کېین نرخلر آشیشی کېرهکلیگی حقیدهگی کوتیلمهلر بیلن ماس کېلمهیدی.
شونینگدېک، افغانستانگه قۉشنی هندستان و پاکستانده یۉق قیلینگن کۉکنار میدانلری حجمی هم کېسکین آشگن. ۲۰۲۲-ییلدهگی بېیش مینگ۸۶۸ هکتار کۉرستکیچ ۲۰۲۳ییلده اۉن اوچ مینگ۲۰۰ هکتارگه یېتگن.
طالبان ۲۰۲۲-ییلده تریاک یېتیشتیریش، شونینگدېک گیاهوند مادّهلرنی ساتیب آلیش و ساتیشنی تعقیقلهگن اېدی.
بیرلشگن ملتلر تشیکلاتی ینگی حساباتیده تعقیق اجراسی اېندیلیکده تۉرتینچی ییلگه کیرگنینی قید اېتگن.
مذکور تشکیلات اوّلراق افغانستانده تریاک یېتیشتیریش ۹۵ فایزگه کمهیگنی حقیده خبر بېرگن اېدی. بیراق محلي منبعلر اَیریم ولایتلرده، اینیقسه مملکت شِمالیده کۉکناری یېتیشتیریش هنوز دوام اېتهیاتگنینی بیلدیرماقده.
حساباتده افغانستان ایچیده و اونینگ اطرافیدهگی حدودلرده هروئین همده تریاک مصادره قیلینیشی دوام اېتهیاتگنی، بیراق موجود ذخیرهلر کمهیگنی سببلی مصادره حجمی اوّلگیدن انچه پهسهیگنی تأکیدلنگن.
بیرلشگن ملتلر تشکیلاتی معلوماتیگه کۉره، مصادره قیلینهیاتگن گیاهوند مادّهلر حجمی تریاک یېتیشتیریش تعقیقلنیشیدن آلدینگی دورگه نسبتاً قریب یرمیگه توشگن. بو اېسه افغانستاندن گیاهوند مادّهلر تأمیناتی قیسقرگنینی کۉرسهتهدی.
بیرلشگن ملتلر تشکیلاتی نینگ ۲۰۲۵-ییلگی حساباتیده افغانستانده کۉکنار اېکیلگن میدان ۱۰ مینگ ۲۰۰هکتار دېب بهالنگن بۉلیب، بو ۲۰۲۴-ییلگه نسبتاً ۲۰ فایزگه کم.
۲۰۲۴-ییلده مملکتده ۱۲ مینگ ۶۰۰ هکتار یېرگه کۉکنار اېکیلگن اېدی. تعقیق جاري اېتیلیشیدن اوّل، یعنی ۲۰۲۲-ییلگچه اېسه بو کۉرستکیچ 232 مینگ هکتارنی تشکیل اېتگن.
بیرلشگن ملتلر تشکیلاتی حساب-کتابیگه کۉره، ۲۰۲۵-ییلده افغانستانده ۲۹۶ تُن تریاک یېتیشتیریلگن بۉلیب، بو ۲۰۲۴-ییلگه نسبتاً ۳۲ فایزگه کم. حساباتگه کۉره، ۲۰۲۴-ییلده دهقانلر تریاک سوداسیدن ۲۶۰ میلیون امریکا دالری درآمد آلگن بۉلسه، ۲۰۲۵-ییلده بو کۉرستکیچ ۲۳۴ میلیون امریکا دالریگچه کمهیگن.
