افغانستاننینگ جنیوادهگی نمایندهسی نصیر احمد اندیشهنینگ معلوم قیلیشیچه،۴۱ دولت بیرلشگن ملتلر تشکیلاتی انسان حقوقلری کېنگشیده اعلان قیلینگن قۉشمه بیاناتده طالبان حکمرانلیگی آستیده افغانستان عیاللری و قیزلریگه نسبتاً عملگه آشیریلهیاتگن تیزیملی ظلم و کمسیتیشنی قارهلهگن.
اندیشه اوشبو بیاناتنی مذکور دولتلر نامیدن انسان حقوقلری کېنگشی ییغیلیشیده تقدیم اېتدی.
بیاناتده قید اېتیلیشیچه، کېتمه-کېت بېشینچی ییل افغانستان عیاللری و قیزلری تعلیم آلیش، ایشلش، ساغلیقنی سقلش خدمتلریدن فایدهلنیش، جماعت حیاتیده اشتراک اېتیش، مدنی فضا همده انسانپرورلیک فعالیتیدن محروم اېتیلماقده.
بیاناتنی امضالهگن دولتلر طالبان نینگ «امر به معروف» خادملری تامانیدن عملگه آشیریلهیاتگن اۉزباشیمچهلیک بیلن حبسگه آلیشلر، تعقیب و تضییقلر، سانسور همده زۉرآورلیک عیاللرنی باستیریش واسطهسیگه ایلنگنینی تأکیدلهدی.
شونینگدېک، بیاناتده طالبلرنینگ کمسیتووچی حقوقي حجتلری، جملهدن عایلهدهگی زۉرآورلیکنی عادتي حال صفتیده قبول قیلهدیگن ۱۲-سانلی فرمان و بالهلر نکاحیگه رخصت بېرووچی ۱۸-سانلی فرمان عیاللر همده قیزلر حقوقلری نینگ ینه-ده کۉپراق بوزیلیشیگه سبب بۉلهیاتگنی قید اېتیلگن.
بیانات یازووچیلری بیرلشگن ملتلر تشکیلاتینینگ افغانستان بۉییچه مخصوص گزارشگلری وکالتینی همده مستقل جوابگرلیک میکانیزمینی قۉللب-قوّتلش و مستحکملشگه چقیردی. اولر نینگ تأکیدلشیچه، افغانستان عیاللری و قیزلری نینگ حقوقلرینی تیکلش همده انساني قدر-قیمتینی حمایه قیلیش موجود وضعیتگه نسبتاً خلق ارا سیاست و چارهلر مرکزیده توریشی لازم.
سۉنگگی بېش ییل دوامیده طالبلرنینگ عیاللرگه نسبتاً چېکلاولری تاباره کوچهییب بارماقده.
طالبلر حاکمیتینینگ بیرینچی ییلیدهیاق قیزلرنی مکتب و بیلیم یورتلریدن، عیاللرنی اېسه کۉپلب ایش جایلریدن چېتلهتگن اېدی. کېینچهلیک بو چېکلاولر تاباره کېنگهییب، بوگونگی کونده عیاللر دېیرلی جماعت حیاتیدن بوتونلهی سیقیب چیقریلگن. سۉنگگی پیتلرده اېسه طالبلر اَیریم ولایتلرده عیاللرنی کيینیش ترتیبیگه رعایه قیلمهگنلیک بهانهسی بیلن حبسگه آلیشنی هم باشلهگن.
