بوگون (جمعه، ۵-سرطان) افغانستاننینگ کابل، هرات و قندهار کبی بیر قطار ولایتلریده عاشورا مناسبتی بیلن عزادارلیک مراسملری اۉتکزیلدی.
کابلده عزادارلیک مراسملری شیعهلرگه قرهشلی بیر قطار مسجد و تکيهخانهلرده بۉلیب اۉتدی.
طالبلر بوگون اېرته تانگدن باشلب پایتخت کابلده مابیل علاقه خدمتلرینی وقتینچه تۉختهتدی.
هراتنینگ شیعهلر استقامت قیلهدیگن حدودلری، جملهدن اندیشه شهرچهسی و جبریل منطقهسیدده هم عزادارلیک مراسملری و سینه اوریش مراسملری تشکیل اېتیلدی.
قندهارده اېسه شیعهلر فاطميه جامع مسجدیده عاشورا مناسبتی بیلن عزادارلیک مراسمینی اۉتکزدیلر.
جاري ییلگی محرّم مراسملری هم اوّلگی ییللردهگی کبی طالبان تامانیدن جاري اېتیلگن چېکلاولر آستیده اۉتدی.
افغانستان شیعه علمالری کېنگشی کېچه اعلان قیلگن بیاناتیده طالبلر سۉنگگی کونلرده اَیریم مسجد و تکيهخانهلر مسووللرینی عزادارلیک رمزلرینی کۉترگنلیک سببلی حبسگه آلگنینی معلوم قیلدی.
بیاناتده ایتیلیشیچه، طالبان محرّم بۉییچه امیرلیک کمیتهسی بیلن اېریشیلگن کېلیشوولرگه ضد روشده اَیریم مسجد و حسینیهلردن عزادارلیک بیراقلری و رمزلرینی آلیب تشلهگن.
سیاسي چهرهلرنینگ عاشورا مناسبتی بیلن پیاملری
عاشورا مناسبتی بیلن افغانستان نینگ بیر قطار سیاسي چهرهلری هم همدردلیک و تبریک مضمونیدهگی پیاملرینی نشر قیلدیلر.
سابق جمهور رییس حامد کرزی اۉز پیامیده شوندهی دېدی: «امام حسین اصلاحات یۉلیدهگی بویوک حرکتی آرقهلی جمعیتدهگی آغیشلرنی فاش اېتدی، انسانلرنی اۉزینی اصلاح قیلیشگه و عمللرینی تۉغریلشگه دعوت اېتدی. او خلقنی اویغاتیش و مسوولیت تویغوسینی شکللنتیریش یۉلیده جانینی فدا قیلیب، کربلا تاریخي قهرمانلیگینی میراث قالدیردی.»
کرزینینگ تأکیدلشیچه، افغانستان خلقی باشقه مسلمانلر سینگری عاشورا و امام حسین قیامینی احترام بیلن نشانلهیدی همده پیغمبر محمد (ص) اهل بَیتیگه محبتنی بیرلیک و برادرلیک عاملی دېب بیلهدی.
سابق ملي یرهشوو عالي کېنگشی رئیسی عبدالله عبدالله اېسه اۉز پیامیده عاشورانی اسلام تاریخیدهگی اېنگ بویوک و مضمونلی کونلردن بیری دېب اتهب، بو کون اِیمان، تقوا، صبر، فداییلیک و مشقتلرگه برداش بېریش کبی عالي قدریتلرنینگ یارقین نمونهسی اېکنینی تأکیدلهدی.
اونینگ یازیشیچه، عاشورا مسلمانلرنی دیني قدریتلر حقیده چوقورراق مشاهده قیلیشگه، بیردملیکنی مستحکملشگه، عدالتنی قرار تاپتیریشگه همده انساني و اسلامي تمایللرگه صادق قالیشگه چارلهیدی.
افغانستان ملي قرشیلیک جبههسی رهبری احمد مسعود هم اۉز بیاناتیده: « عاشورا بیزگه ظلم قرشیسیده توریش نهفقط تنلاو، بلکه اِیماني، انساني و تاریخي مسوولیت اېکنینی اۉرگهتدی»، دېدی.
اونینگ سۉزلریگه کۉره، بوگون افغانستان خلقی ظلم، محروملیک و عدالتسیزلیک سایهسیده یشهیاتگن بیر پیتده، عاشورا پیامی ینه بیر بار مسوولیت، اویغاقلیک و ظلمگه قرشی جسارت ضرورلیگینی اېسلهتماقده.
مسعود، شونینگدېک، افغانستان خلقی اېرکینلیگی، عدالت، انسان قدر-قیمتی و خلق ارادهسی اوستوارلیگینی تأمینلش یۉلیدهگی اۉز صداقتینی ینه بیر بار تأکیدلهدی.
مذکور پیام نشر قیلینگن پیتگچه طالبان رهبرلری یاکه رسمي وکیللری تامانیدن عاشورا مناسبتی بیلن هېچ قندهی رسمي بیانات اعلان قیلینمهگن.
