طالبان نینگ شهرسازلیک وزیری اۉرینباسری مدارعلی کریمی اوشبو گروه نینگ عدلیه وزیری عبدالحکیم شرعينی محرّم مراسملریگه چېکلاولر جاري قیلگنی اوچون تنقید قیلدی. اونینگ ایتیشیچه، محرّم مراسملریگه ارهلشیش عدلیه وزیرلیگی نینگ وصلاحیتیگه کیرمهیدی.
کریمی بیبیسیگه بېرگن صحبتیده عبدالحکیم شرعي عزدارلیک بیراقلرینی آلیب تشلش حقیده بویروق بېرگنینی همده بیر قطار شیعه آقسقاللریگه نسبتاً «قتّيق مناسبت» کۉرسهتگنینی ایتدی.
اونینگ تصدیقلشیچه، عبدالحکیم شرعي عزادارلیک بیرقلرینی آلیب تشلشگه قرشیلیک کۉرسهتگن بیر نېچه شیعه یېتکچیلرینی حبسگه آلگن.
کریمینینگ ایتیشیچه، عدلیه وزیری نینگ «قطعي و کېسکین» مناسبتی سببلی او طالبلر باش وزیری حسن آخوند بیلن بو مسألهنی محاکمه قیلگن. اوشبو صحبتدن سۉنگ عدلیه وزیری حبسگه آلینگن شخصلرنی آزاد قیلگن.
کریمی، شونینگدېک، عدلیه وزیری باشقه ادارهلر نینگ صلاحیتیگه ارهلشمسلیگی کېرهکلیگینی تأکیدلب، محرّم مراسملری مسألهسی عدلیه وزیرلیگیگه علاقهدار اېمسلیگینی بیلدیردی.
کېچه افغانستان شیعه علمالری کېنگشی بیانات بېریب، طالبان سۉنگّی کونلرده اَیریم مسجد و تکيهخانهلر مسووللرینی عزدارلیک رمزلرینی کۉترگنلیک سببلی حبسگه آلگنینی معلوم قیلگن اېدی.
کېنگش حبسگه آلینگن مسجد و تکيهخانهلر مسووللری سانی همده اولرنی طالبان نینگ قَیسی ادارهسی قۉلگه آلگنیگه انیقلیک کیریتمهگن. بیراق خبرلرگه کۉره، طالبان عدلیه وزیری بیر قطار شیعه آقسقاللرینی چقیرتیریب، حبسگه آلگن.
افغانستان انترنشنل تلویزیونی خبریگه کۉره، عبدالحکیم شرعي اوشبو شخصلرنینگ اَیریملرینی بیر نېچه ساعت دوامیده اۉزی نینگ شخصي قماقخانهسیده اوشلب تورگن، سۉنگ اولردن عزدارلیک بیرقلرینی آلیب تشلش حقیده مجبوري تیلخط آلگن.
