منبعلر اطلاعات روز گزیتهسیگه طالبان سابق حکومت نینگ پولیس افسری نصرتالله حاجیزادنی کابولده ایکّینچی بار حبسگه آلگنینی معلوم قیلدی.
حاجیزادهنینگ یقینلری اونی اۉتگن هفته چهارشنبه کونی (۳-سرطان) ساعت تخمیناً۴:۰۰ ده کابل شهریدهگی «مریم لیسهسی» منطقهسیدن طالبلر استخبارات خدمتی خادملری حبسگه آلیب، نامعلوم جایگه آلیب کېتگنینی تصدیقلهدی.
۳۵ یاشلی نصرتالله حاجیزاده پروان ولایتی نینگ جبلاسِراج اولسواللیگی «نصراللهخیل» قیشلاغیده توغیلگن.
او سۉنگگی ییللرده خاتینی و اوچ فرزندی بیلن کابل نینگ خیرخانه منطقهسیدهگی «لیوای باباجان» حدودیده یشب کېلگن.
حاجیزاده جمهوریت دوریدهگی سۉنگگی خدمتیده میدان وردک ولایتی پولیس قوماندانلیگیده تۉلی قوماندانی لوازمیده ایشلهگن.
منبعلرگه کۉره، جمهوریت توزومی قولهگچ و طالبلر ینه حاکمیتنی اېگهلهگچ، او حربي فعالیتنی ترک اېتیب، دوکاندارلیک بیلن شغللنگن.
بیراق، بو طالبلر اونی سۉنگگی بېش ییل ایچیده ایکّینچی بار حبسگه آلهیاتگنیدیر. نصرتالله حاجیزاده بیرینچی مرته 1403-هجري-شمسي ییلده هم طالبان استخباراتی تامانیدن حبسگه آلینیب، آلتی آی قماقده سقلنگن اېدی.
طالبلر رهبری هبتالله آخوندزاده تامانیدن اعلان قیلینگن «عمومي عفو»گه قرهمهی، سابق حربيلرنی حبسگه آلیش، قییناققه سالیش و اۉلدیریش حالتلری دوام اېتماقده.
تۉقّیز کون آلدین (جمعه، ۲۹جوزا) سابق حربي یاسیر حسینی دایکندی ولایتی نینگ شهرستان اولسواللیگی مرکزیده اۉز دوکانی قرشیسیده اۉلدیریلگن، ینه بیر سابق حربي حشمتالله حصاریی نینگ جسدی اېسه طالبان تامانیدن حبسگه آلینگنیدن تۉرت کون اۉتیب کاپیسا ولایتیده تاپیلگن.
شونینگدېک، اۉشه کونی منبعلر پنجشیردن اطلاعات روز گزیتهسیگه محمد سهراب، ذاکر، محمد صالح، نصرالله و پیروز اسملی بېش نفر سابق حربي قورال سقلهگنلیک عیبلاوی بیلن اوشبو ولایت نینگ دره تومنیدهگی عبدالله خیل درهسیده طالبان تامانیدن حبسگه آلینگنینی معلوم قیلگن.
