طالبلر ایچکی ایشلر وزیرلیگی ننگرهار ولایتیده قریب 5 مینگ ته نشهقیلووچی تابلتنی ناقانوني آلیب کېتیشده گمان قیلینگن بیر شخص حبسگه آلینگنینی معلوم قیلدی.
طالبلر ایچکی ایشلر وزیرلیگی نینگ گیاهوند مادّهلرگه قرشی کورهش اۉرین باسرلیگی بوگون (شنبه، ۶-سرطان) نشر قیلگن بیاناتگه کۉره، اوشبو شخص جلال آباد شهری نینگ ۹- ناحیهسیده قۉلگه آلینگن.
بیاناتده ایتیلیشیچه، گمانلنووچی تېزکار-قیدیروو عملیاتی دوامیده تۉرت مینگ۷۳۹ته نشهقیلووچی تابلت بیلن اوشلنگن.
معلوم قیلینیشیچه، دستلبکی تېرگاو یکونلنگچ، حبسگه آلینگن شخص عدلیه ومحکمه اۉرگانلریگه تاپشیریلهدی.
بو آرهده، بیرلشگن ملتلر تشکیلاتینینگ افغانستانده گیاهوند مادّهلر و جنایتچیلیک بۉییچه باشقرمهسی مملکتده گیاهوند مادّهلرنی استعمال قیلیش عادتلری عنعنوي مادّهلر نشه چرس و تریاک گیاهوند مادّهلر، جملهدن متامفتامین (شیشه) «کا» تابلتلری و باشقه دارو واسطهلریگه تامان اۉزگرهیاتگنینی معلوم قیلگن.
مذکور اداره باشلیغی پولیک اوک سیری تیناوون (جمعه، ۵-سرطان) بوتون جهان گیاهوند مادّهلرگه قرشی کورهش کونی مناسبتی بیلن یۉلهگن پیامیده، افغانستانده افیونی و باشقه گیاهوند مادّهلرنی استعمال قیلیش اصوللری اۉزگریب بارهیاتگنینی تأکیدلهگن.
