طالبلر رسميلری لغمان همده ننگرهاردهگی محلي منبعلرنینگ معلوم قیلیشیچه، اوشبو ایکّی ولایتده یوز بېرگن ایکّی ترافیک حادثهسی عاقبتیده کمیده بېش کیشی جان بېرگن ینه یېتّی کیشی یرهلنگن.
طالبلرنینگ لغمان ولایتی پولیس قوماندانلیگی مطبوعات سۉزلاوچیسی محمد یونوس یوسفزینینگ ایتیشیچه، بوگون (شنبه، ۶-سرطان) اېرتهلب علی شینگ اولسواللیگینینگ «تارووی» قیشلاغیده بیر موتر یۉلدن چیقیب اغدریلیب کېتگن.
حادثه عاقبتیده اوچ کیشی هلاک بۉلگن، ینه ایکّی کیشی جراحتلنگن. اونینگ قۉشیمچه قیلیشیچه، جراحتلنگنلر دوالنیش اوچون مهترلامدهگی لغمان مرکزي شفاخانهسیگه آلیب باریلگن و اولر نینگ احوالی برقرار.
طالبلرنینگ لغمان پولیس قوماندانلیگی مطبوعات سۉزلاوچیسی حادثه هیداوچی نینگ احتیاطسیزلیگی سبب یوز بېرگنینی بیلدیرگن.
شو بیلن بیرگه، ننگرهاردهگی محلي منبعلر بوگون توشگچه ترخم–جلال آباد یۉلیده ایکّی موتر تۉقنهشووی عاقبتیده ایکّی کیشی اۉلگنی ینه بېش کیشی جراحت آلگنینی خبر قیلدی.
منبعلرگه کۉره، حادثه ننگرهار ولایتینینگ مومند دره تومنیدهگی «دکی» منطقهسیده یوز بېرگن.
مذکور حادثهنینگ سببی حاضرچه انیقلنمهگن. طالبان نینگ محلي رسميلری هم بو بارهده حاضرگچه ایضاح بېرمهگن.
