افغانستان خبرچیلر مرکزی تمدن تلویزیونینینگ مسوول محرری محمد رحمتی همده اوشبو تلویزیون خادیمی محمد رضا احسانی طالبلر تورمهسیدن تېزلیک بیلن آزاد اېتیشگه چقیردی.
مرکز بوگون (شنبه،۶-سرطان) نشر قیلگن بیاناتیده اوشبو ایکّی ژورنالیست نینگ حبسگه آلینیشینی قارهلهدی.
شونینگدېک، افغانستان خبرچیلر مرکزی تمدن تلویزیونی ادارهسی قَیته آچیشنی طلب قیلیب، طالباندن اوشبو یېتکرمه خادملریگه تهدید و حبسگه آلینیشی خوفیسیز اېرکین فعالیت یوریتیش امکانینی بېریشنی سۉرهدی.
تمدن تلویزیونی بوگون اۉزینینگ مسوول محرری و بیر خادیمی آلتی کون آلدین طالبلر عدلیه وزیرلیگی بویروغی بیلن حبسگه آلینگنی همده حاضرده یکّه ترتیبدهگی قماخانهده سقلنهیاتگنینی معلوم قیلگن اېدی.
بیراق افغانستان خبرچیلر مرکزی اوشبو تلویزیوندهگی بیر منبعگه تهیهنیب، مذکور ایکّی خادم طالبان کوچلری نینگ تلویزیون بناسیگه باستیریب کیرگنی حقیدهگی خبر اعلان قیلینگنیدن سۉنگ حبسگه آلینگنینی یازدی.
طالبان عدلیه وزیرلیگیگه علاقهدار کوچلر تۉرت کون اوّل (سهشنبه، ۲-سرطان) کابلدهگی تمدن تلویزیونی مرکزي دفتری باستیریب کیریب، اونینگ نشراتی تۉختهتگن و ادارهسینی مُهرلب یاپگن اېدی.
تمدن تلویزیونی رهبریتی ادارهسی دولت یېریده قوریلگنی حقیدهگی دعوا سبب یاپیلگنینی بیلدیرگن. بیراق اوشبو ایش حاضر طالبلرنینگ مخصوص محکمهده کۉریب چیقیلماقده و حلی یکوني حکم چیقریلمهگن.
