اېلچیخانه بوگون (یکشنبه، ۷-سرطان) ترقهتگن بیاناتده اَیتیلیشیچه، اوشبو کېنگشنی تشکیل اېتیش تۉغریسیدهگی کېلیشوو بیشکېک شهریده اۉتکزیلگن افغانستان-قیرقیزستان بیزنس فارومی دایرهسیده امضالنگن.
معلوم قیلینیشیچه، کېنگشنی توزیشدن مقصد ایکّی مملکت تدبیرکارلری اۉرتهسیدهگی تۉغریدن تۉغری علاقهلرنی مستحکملش، قۉشمه تشبثلرنی موافقلشتیریش همده اقتصادي لایحهلرنی ایلگری سوریش و قۉللب-قوّتلشدن عبارت.
طالبلرنینگ بیشکېکدهگی اېلچیخانهسی سرپرستی عبدالشکور حقّانينینگ اَیتیشیچه، هر ایکّی تامان تجارت علاقهلرینی رواجلنتیریش و قۉشمه اقتصادي تشبثلرنی قۉللب-قوّتلشنی دوام اېتتیرهدی.
اېسلهتیب اۉتهمیز، قیرقیزستان اۉتگن ییلنینگ قوس آییده کابلده سودا اویینی تشکیل اېتگن اېدی.
طالبان ۱۴۰۰-ییلده افغانستانده حاکمیتنی قَیته اېگهلهگنیدن سۉنگ مرکزي آسیا دولتلری بیلن سیاسي همده تجارت-اقتصادي علاقهلرنی سېزیلرلی درجهده کېنگهیتیردی.
طالبان تشقی ایشلر وزیری امیرخان موتهقي ایکّی هفته اوّل افغانستان-مرکزي آسیا تدقیقات مرکزلری ییغیلیشیده افغانستان و مرکزي آسیانی عمومي کېلهجک باغلب توریشینی تأکیدلب، اوشبو مملکتلر اۉرتهسیدهگی جماعهوي همکارلیک و کۉپ تامانلهمه علاقهلرنی عملي یاندشوو اساسیده ینه-ده مستحکملش و کېنگهیتیریش ضرورلیگینی بیلدیرگن اېدی.
