کابلنینگ قرهباغ اولسوالیگیدهگی محلي منبعلرنینگ اَیتیشیچه، طالباننینگ «امر به معروف و نهي از منکر» خادملری عاشورا کونی شیعهلرنینگ قلعهی شاهيدهگی خاتم الانبیا مسجدیده اۉتکزیلهیاتگن عزدارلیک مراسمینی تۉختهتیب، «شیعهلرنینگ نذرینی یېییش حرام» اېکنینی بیلدیرگن.
محلي منبع بوگون (یکشنبه، ۷-سرطان) معلوم قیلیشیچه، طالبلر خادملری عاشورا مراسمی دوام اېتهیاتگن پیتده مسجدگه باستیریب کیریب، عزدارلیک اشتراکچیلرینی تشقریگه چیقرگن و مسجد اېشیکلرینی یاپگن.
منبعنینگ سۉزلریگه کۉره، طالبان خادملری محله اهالیسینینگ شیعهلر ترقهتگن نذرنی استعمال قیلیشیگه هم تۉسقینلیک قیلگن. اولر شیعهلرنی حقارتلب، اولرنی «مشرک» دېب اتهگن همده اولرنینگ نذرینی یېییش «حرام» اېکنینی اَیتگن.
معلوماتلرگه کۉره، واقعهدن سۉنگ محلي شیعهلر مسألهنی کۉریب چیقیش اوچون طالباننینگ قرهباغ تومنی حاکمی حضوریگه مراجعت قیلگن، بیراق او بو مسألهگه اعتبار بېرمهگن.
منبعلر تأکیدلشیچه، کابلنینگ قرهباغ اولسواللیگیده فقط بیرته قیشلاق اهالیسی شیعه مذهبیگه منسوب بۉلیب، اولر هر ییلی عاشورا مراسمینی سنّیلر اشتراکیده اۉتکزهدی. جاري ییلگی مراسمده هم کۉپلب سنّیلر قتنهشگن اېدی.
طالبان ۲۰۲۱-ییلده افغانستانده حاکمیتنی قَیته اېگهلهگنیدن بویان محرّم آییدهگی شیعهلر عزدارلیک مراسملریگه کېنگ کۉلملی چېکلاولر جاري اېتیب کېلماقده.
جاري ییلگی محرّم آییده هم اوشبو چېکلاولر سقلنیب قالدی. شونینگدېک، طالبلر عدلیه وزیری عبدالحکیم شرعی کۉرسهتمسی بیلن شیعه جماعهسینینگ بیر قطار آقسقاللری هم حبسگه آلینگن.
