عراق دولت اخبارات آژانسی مملکتنینگ فسادگه قرشی مخصوص کوچلری فسادگه عیبلنگن ۴۷کیشینی، جملهدن یوقاری لوازملی دولت عملدارلری و پارلمان اعضالرینی حبسگه آلگنینی معلوم قیلدی.
خبرگزارلیک خبریگه کۉره، یوقاری مرتبهلی حکومت عملدارلریدن بیری اوشبو شخصلر بوگون (یکشنبه، ۷-سرطان) اېرتهلب بغداددهگی یشیل حدودده اۉتکزیلگن کېنگ کۉلملی عملیات دوامیده قۉلگه آلینگنینی اَیتگن.
اونینگ سۉزلریگه کۉره، بغداد و عراقنینگ باشقه ولایتلریده فسادگه گمان قیلینگن شخصلرنی قیدیریش و حبسگه آلیش عملیاتلری دوام اېتهدی.
عراق دولت اخبارات آژانسی مخصوص حساباتیده اوشبو حبسلر بیرینچی فساد عیبلاوی بیلن قۉلگه آلینگن عراق نفت وزیری اۉرینباسری «عدنان الجمیلی» نینگ کۉرسهتمهلری آرتیدن عملگه آشیریلگنینی یازگن.
خبرگزارلیک حبسگه آلینگنلردن ۱۵ نفرینینگ اسمینی هم آشکار قیلگن. اولر آرهسیده ۱۳ نفر پارلمان اعضاسی همده نفت وزیرلیگینینگ ینه بیر وزیر اۉرینباسری بار.
عراقنینگ «شفق نیوز» نشری اېسه بغداددهگی یشیل حدود همان یاپیق اېکنینی، حکومت تېرگاو یکونیگه قدَر اَیریم عملدارلر و پارلمان اعضالریگه مملکتدن چیقیشنی تعقیقلهگنینی خبر بېردی.
نشرنینگ یازیشیچه، خوفسیزلیک کوچلری بوگون اېرتهلبدن بغداددهگی یشیل حدودگه آلیب بارووچی کیریش یۉللرینی یاپیب، پارلمان اعضالری، سیاستچیلر و تدبیرکارلرنینگ اویلریده کېنگ کۉلملی تینتوولر باشلهگن.
مذکور حبسلر عراق باش وزیری «علی فالح الزیدی»نینگ بېواسطه کۉرسهتمسی بیلن عملگه آشیریلگن. او سیلاوآلدی کمپاینی دوامیده مملکتدهگی کېنگ ترقهلگن فسادگه قرشی قطعي کورهش آلیب باریشگه وعده بېرگن اېدی.
