پاکستان پکتيا، پکتیکا و کنر ولایتلریدهگی «تیتیپی» موضعلریگه هجوم قیلگنینی معلوم قیلگنیدن سۉنگ، طالبلر بو هجوملرده اۉنلب تینچ اهالی هلاک بۉلگنی و یرهلنگنی حقیده بیانات بېردی.
طالبان مطبوعات سۉزلاوچیسی ذبیحالله مجاهد بوگون (دوشنبه، ۸-سرطان) ایکس اجتماعي ترماغیده یازیشیچه، پاکستان هجوملریده «اۉنلب تینچ اهالی، عیاللر و بالهلر» هلاک بۉلگن.
اونینگ ایتیشیچه، پاکستان کوچلری کېچه تونده پکتیکا نینگ گيان، پکتيا نینگ سمکنی و کنرنینگ منوره اولسوالیکلریدهگی «تورر جای حدودلری»نی بامباردمان قیلگن.
شو بیلن بیرگه، پاکستان اخبارات و اېشیتتیریشلر وزیری عطاءالله تارر ایکس ترماغیده نشر قیلگن بیاناتیده افغانستان نینگ اوشبو اوچ ولایتیگه اویوشتیریلگن هجوملرنی تصدیقلهدی.
اونینگ سۉزلریگه کۉره، هجوملر «تحریک طالبان پاکستان» (تیتیپی) و اونینگ اجرهلیب چیققن قناتی «جماعت الاحرار»گه قرشی عملگه آشیریلگن.
پاکستان اخبارات وزیری بو عملیاتلر پاکستان ایچکریسیده، خصوصاً خیبر پختونخوا، بلوچستان و کراچیدهگی رنجرز سند قرارگاهیگه قرشی صادر اېتیلگن سۉنگگی کۉپلب «ترورچیلیک حادثهلری» آرتیدن باشلنگنینی ایتدی.
اونینگ قۉشیمچه قیلیشیچه، عملیاتلر دوامیده خیبر پختونخوا نینگ باجور حدودیده تیتیپی نینگ یوقاری مرتبهلی قوماندانی «خان فاروش» لقبلی «زبل» جماعت اولاحرارنینگ اوچ اعضاسی بیلن بیرگه اۉلدیریلگن، گروه نینگ ینه بیر نېچه اعضاسی اېسه یرهلنگن.
تارر شوندهی دېدی: «غضب للحق» عملیاتی نینگ پاکستان–افغانستان چېگره حدودیدهگی دوامیده پکتيا، پکتیکا و کنردهگی اوچته نشانگه ضربه بېریلدی.
نتیجهده 25 نفر ترورچی یۉق قیلیندی.» اونینگ ایتیشیچه، اوشبو هجوملرده «مذکور مرکز و یشیرین جایلرده سقلنگن کتّه مقداردهگی قورال-یراغ و اۉق-داریلر هم یۉق قیلینگن».
پاکستان اوردوسی نینگ اوشبو هجوملری سۉنگگی اوچ آی دوامیده خیبر پختونخوا و بلوچستان ولایتلریده یوزلب خوفسیزلیک حادثهلری صادر بۉلگن بیر پیتده عملگه آشیریلدی.
سۉنگگی قانلی حادثهلردن بیریده، شنبه آقشامی (۶-سرطان) «جماعت اولاحرار» سیند ولایتی نینگ مرکزی کراچی شهریدهگی «سیند رنجرز» ناملی حربي بازهگه هجوم اویوشتیردی.
هجومچیلر اوّل پارتلاوچی مادّهلر آرتیلگن موترنی بازه نینگ اساسي کیریش دروازهسیگه اوریب پارتلهتگن، سۉنگ اۉق اوزیشنی باشلهگن.
محلي رسميلر معلوماتیگه کۉره، حادثه عاقبتیده اوچ نفر خوفسیزلیک خادیمی و اوچ نفر هجومچی هلاک بۉلگن، ینه تۉرت نفر خوفسیزلیک خادیمی همده بیر نفر هجومچی یرهلنگن. پاکستان اوردوسی جماعتچیلیک بیلن علاقهلر باشقرمهسی یرهلنگن هجومچی افغانستان فقراسی اېکنینی و او تیتیپی نینگ حربي قناتلریدن بیری حسابلنگن «جماعت اولاحرار» اعضاسی اېکنینی معلوم قیلدی.
