افغانستان سابق جمهور رییسی حامد کرزی پاکستاننینگ پکتيا، پکتیکا و کنر ولایتلریگه اویوشتیرگن هجوملریگه مناسبت بیلدیریب، پاکستاننی افراطیتگه نسبتاً قرهمه-قرشی و ایکّی یاقلمه سیاستدن واز کېچیشگه چقیردی.
کرزی بوگون (دوشنبه، ۸-سرطان) ایکس اجتماعي ترماغیده نشر قیلگن بیاناتیده پاکستان هجوملرینی قارهلهدی.
اونینگ تأکیدلشیچه، بو هجوملر «افغانستان ملي حاکمیتینینگ بوزیلیشی و خلقارا معیارلرگه ضد» حسابلنهدی.
سابق جمهور رییس شوندهی دېدی: «پاکستاننینگ منفعتی شوندهکی، او افراطیتگه نسبتاً قرهمه-قرشی و ایکّی یاقلمه سیاستینی دوام اېتتیریشدن واز کېچیب، افغانستان بیلن تېنگلیک تمایللری اساسیده مناسبت آلیب باریشی کېرهک.»
کرزی پاکستاننینگ «افراطیتگه نسبتاً ایکّی یاقلمه یاندشووی» حقیده اوّل هم بیر نېچه بار گپیرگن و بو مملکتنی افغانستان ایچیدهگی افراطی گروهلرنی قۉللب-قوّتلشده عیبلهگن اېدی.
او آخرگی مرته جاري ییل نینگ ۱۳-جوزا کونی نشر قیلگن بیاناتیده پاکستاندهگی بوگونگی خوفسیزلیک معمالری اوشبو مملکت نینگ اۉنلب ییللر دوامیده افراطیتنی قۉللب-قوّتلهگنی و اوندن افغانستانگه قرشی تشقی سیاست واسطهسی صفتیده فایدهلنگنی عاقبتی اېکنینی ایتگن اېدی.
سۉنگگی اوچ آی دوامیده پاکستانده هر آی قریب۱۰۰ته خوفسیزلیک حادثهسی قید اېتیلگن. اوشبو حادثهلرنینگ عیبدارلریگه قرشی کورهش بهانهسیده پاکستان بیر نېچه بار افغانستان توپراغیگه مراجعت قیلگن.
پاکستان کېچه تونده پکتيا، پکتیکا و کنر ولایتلریگه ضربهلر بېرگنینی همده «تحریک طالبان پاکستان» (تیتیپی) نینگ۲۵ نفر اعضاسی یۉق قیلینگنینی معلوم قیلدی.
بیراق طالبان پاکستان اوردوسی تینچ اهالی نینگ تورر جایلرینی بامباردمان قیلگنینی دعوا قیلماقده. پکتيادن ترقهلگن اَیریم صورتلرده اېسه جراحتلنگن بیر نېچه بالهنی کۉریش ممکن.
