طالبلر مطبوعات سۉزلاوچیسی اۉرینباسری حمدالله فطرتنینگ معلوم قیلیشیچه، پاکستاننینگ پکتيا و پکتیکا ولایتلریگه اویوشتیرگن هجوملری عاقبتیده جمعی۳۶ کیشی جان بېرگن، ینه۱۶۳کیشی یرهلنگن.
فطرت بیاناتیده اۉلدیریلگنلر همده یرهلنگنلرنینگ برچهسی تینچ اهالی اېکنینی، اولر آرهسیده عیاللر و بالهلر هم بارلیگینی ایتدی.
او ایکس اجتماعي ترماغیده یازیشیچه، پاکستان نینگ پکتيا ولایتی سمکنی اولسواللیگیدهگی «مندوخېل» قیشلاغیده جایلشگن تورر جایگه بېرگن ضربهسی عاقبتیده۲۸ کیشی هلاک بۉلگن، ینه۱۵۸ کیشی یرهلنگن.
اونینگ سۉزلریگه کۉره، پاکستان قیرووچی اوچاقلری نینگ دستلبکی هجومیده بیر کېکسه کیشی و بیر باله هلاک بۉلگن، عایله نینگ باشقه اعضالری اېسه یرهلنگن. محلي اهالی یاردمگه ییغیلگن پیتده اېسه منطقه ینه بامباردمان قیلینگن.
فطرتنینگ ایتیشیچه، پاکستان اوردوسی پکتیکا ولایتی گيان اولسواللیگی «ولوست» قیشلاغیدهگی تورر جاینی هم بامباردمان قیلگن. عاقبتده عیاللر و بالهلرنی اۉز ایچیگه آلگن آلتی نفر تینچ اهالی هلاک بۉلگن.
کنر ولایتینینگ منور تومنیده هم بیر تورر جای بامباردمان قیلینگن. بو هجومده قربانلر بۉلمهگن، بیراق کتّه مادّي ضرر یېتگن.
طالبلر مطبوعات سۉزلاوچیسی اۉرینباسری نینگ تأکیدلشیچه، پاکستاننینگ کېچهگی تونگی هجوملری نتیجهسیده جمعی۳۶ نفر تینچ اهالی، جملهدن عیاللر و بالهلر هلاک بۉلگن، ینه۱۶۳ کیشی یرهلنگن همده اوچته اوی تۉلیق ویران قیلینگن.
بیراق پاکستان اخبارات و اېشیتتیریشلر وزیرلیگی افغانستان نینگ اوشبو اوچ ولایتیگه اویوشتیریلگن هجوملرنی تصدیقلب، ضربهلر «تحریک طالبان پاکستان» (تیتیپی) یشیرین مسکنلریگه قرهتیلگنی و عملیاتلر دوامیده گروه نینگ۲۵ نفر اعضاسی اۉلدیریلگنینی معلوم قیلدی.
