طالبلر عدلیه وزیرلیگینینگ معلوم قیلیشیچه، «یېرلرنی ناقانوني اېگهللش نینگ آلدینی آلیش کمیسیونی» جوزجان ولایتیده۳۴۴ مینگ جیریبدن آرتیق ییلاو همده۲۳ مینگ جیریب قیشلاق خۉجهلیگی یېرلری و اهالی اوی-جایلرینی «عمومي ییلاو» صفتیده رۉیخطگه آلگن.
وزیرلیک بوگون (دوشنبه،۸-سرطان) اعلان قیلگن بیاناتیده اوشبو یېرلر جوزجان مرکزی شبرغان شهری همده خواجه دۉکۉه، خانقاه، قۉشتېپه، آقچه، فیضآباد و درزاب تومنلریده جایلشگنینی بیلدیردی.
طالبلر عدلیه وزیرلیگی بیاناتیده شوندهی دېییلهدی: «یېرلرنی ناقانوني اېگهللشنینگ آلدینی آلیش کمیسیونی جوزجان ولایتیده یوز مینگلب جیریب یېرلرنی اۉرگنیب چیقیب، جمعی۳۶۷ مینگ۵۷۳ جیریب عمومي ییلاو (مرعی عامه)نی رۉیخطگه آلدی.»
وزیرلیکنینگ قۉشیمچه قیلیشیچه، عمومي ییلاو صفتیده قید اېتیلگن منطقهلرنینگ۲۳ مینگ جیریبدن آرتیغی حاضرده محلي اهالی تامانیدن للمی و سوغارمه دهقانچیلیک یېرلری همده تورر جای صفتیده فایدهلنیب کېلینماقده.
بیاناتده ایتیلیشیچه: «مذکور ییلاولرنینگ۹۳.۷۴فایزی، یعنی۳۴۴ مینگ جیریبدن آرتیغی اۉزینینگ طبيعي ییلاو حالتینی سهقلب قالگن. قالگن۲۳مینگ جیریبدن آرتیق قِسمی اېسه طبيعي حالتدن چیقریلیب، اهالی تامانیدن للمی و سوغارمه اېکین میدانلری همده تورر جایلرگه ایلنتیریلگن یاکه باشقه شکللرده اېگهللب آلینگن.»
طالبلر عدلیه وزیرلیگی «یېرلرنی ناقانوني اېگهللشنینگ آلدینی آلیش و باسیب آلینگن یېرلرنی قَیتریش تۉغریسیده»گی قانون نینگ ۱۳-مادّهسیگه موافق، یشاوچیلر عمومي ییلاولردن فایدهلنیش حقوقیگه اېگه اېمسلیگینی بیلدیرگن. اېگهللب آلینگن یېرلرنینگ کېینگی تقدیرینی انیقلش اوچون اېسه مخصوص هیئت توزیلیب، یېچیم تاپیش وظیفهسی یوکلهتیلگن.
طالبلر سۉنگّی بېش ییلدن کمراق وقت ایچیده مملکت نینگ شهر و قیشلاقلریده 49 میلیون جیریبدن آرتیق یېرنی «امیرلیک/دولت یېرلری» صفتیده اعلان قیلگن.
مملکت نینگ تورلی ولایتلریدهگی یشاوچیلر طالبان کمیسیونلری کۉپلب حاللرده حتا آدملرنینگ شخصي یېرلری و اوی-جایلرینی هم دولت ملکی صفتیده رۉیخطدن اۉتکزهیاتگنیدن شکایت قیلماقده.
