چېگرهسیز داکترلر افغانستان جَنوبیده تۉییب طعاملنمسلیک (ناتۉغری طعاملنیش)دن اذیت چېکهیاتگن بالهلر سانینینگ آرتهیاتگنیدن خواطر بیلدیریب، بو حالت مملکتدهگی آزیق-طعام خوفسیزلیگی تاباره یامانلشهیاتگنینی کۉرسهتهیاتگنینی معلوم قیلدی.
تشکیلات بوگون (سهشنبه، ۹-سرطان) ایکس اجتماعي ترماغیده نشر قیلگن بیاناتیده، ۲۰۲۶-ییل جنوری-اپرېل آیلریده جَنوبدهگی اۉزی قۉللب-قوّتلهیاتگن دوالش مرکزیده آغیر تۉییب طعاملنمسلیک بیلن قبول قیلینگن بالهلر سانی سۉنگگی اوچ ییلنینگ شو دوریگه نسبتاً اۉرتهچه ۳۰فایزدن کۉپراق آشگنینی بیلدیردی.
چېگرهسیزداکترلر تشکیلاتی هلمند و قندهار ولایتلریدهگی فعالیتینی کېنگهیتیرگنینی هم معلوم قیلدی.
شونگه قرهمهی، تشکیلاتنینگ تأکیدلشیچه، تۉییب طعاملنمسلیک موسمینینگ اېنگ آغیر دوری حلی آلدینده و وضعیت ینه-ده یامانلشیشی کوتیلماقده.
تشکیلات افغانستان ایچیدهگی آزیقلنتیریش دستورلری اوچون مبلغ و منبعلرنی تېزلیک بیلن اوستوار یۉنهلیش صفتیده اجرهتیشگه چقیردی.
بیرلشگن ملتلر تشکیلاتی بالهلر جمغرمهسی یونیسف معلوماتلریگه کۉره، افغانستانده بېش یاشگچه بۉلگن ۳.۷میلیون باله تۉییملی آزیق-طعام و تازه ایچیملیک سوویدن یېترلی درجهده فایدهلنه آلمهگنی سببلی اۉتکیر تۉییب طعاملنمسلیکدن اذیت چېکماقده.
بو حالت افغانستانگه کۉرسهتیلهیاتگن انسان پرورلیک یاردم حجمی قیسقرهیاتگن بیر پیتده کوزهتیلماقده.
بیرلشگن ملتلر تشکیلاتی معلوماتلریگه کۉره، جاري ییلده افغانستانده ۲۱.۹میلیون کیشی یاردمگه محتاج. اېنگ ضعیف قتلملرگه یاردم کۉرسهتیش اوچون ۱.۷میلیارد امریکا دالری کېرهک، بیراق حاضرگچه اوشبو مبلغ نینگ اتیگی ۱۴ فایزی مالیهلشتیریلگن.
