طالبلر تشقی ایشلر وزیری امیرخان متقی کابلده قطر اېلچیسی مردف القاشوطی بیلن اوچرهشووده اوشبو مملکتنینگ طالبلر و خلق ارا همجمعيت اۉرتهسیدهگی علاقهلرنی رواجلنتیریش یۉلیدهگی اوزلوکسیز سعی-حرکتلری همده ایجابی رۉلینی قدرلهدی.
طالبلر تشقی ایشلر وزیرلیگی بیاناتیگه کۉره، بوگون (سهشنبه، ۹-سرطان) بۉلیب اۉتگن اوچرهشووده ایکّی تامانلهمه علاقهلرنی رواجلنتیریش و منطقوي مسألهلر محاکمه قیلینگن.
بیاناتده ایتیلیشیچه، قطر اېلچیسی مملکتی واسطهچیلیککه اساسلنگن تشقی سیاستی دایرهسیده طالبان نظارتیدهگی افغانستان بیلن خلق ارا همجمعیت اۉرتهسیدهگی ملاقات و علاقهلرنی رواجلنتیریشنی قۉللب-قوّتلش مجبوريتیگه صادق اېکنینی بیلدیرگن.
قطر تشقی ایشلر وزیرلیگی هم اوچرهشوونی تصدیقلب، اونده «افغانستاندهگی سۉنگّی اۉزگریشلر و افغانستان خلقینی قۉللب-قوّتلش یۉللری» محاکمه قیلینگنینی معلوم قیلدی.
طالبلر افغانستانده حاکمیتگه قَیتگنیدن بویان قطر اوشبو گروه بیلن کېنگ کۉلملی علاقهلرنی یۉلگه قۉیگن.
شونینگدېک، او اَیریم اروپا دولتلری بیلن افغانستان مهاجرلرینی افغانستانگه دېپورت قیلیش مسألهسیده طالبلر و بو دولتلر اۉرتهسیدهگی مذاکرهلرده واسطهچیلیک قیلگن.
قطر، شونینگدېک، طالبان و پاکستان اۉرتهسیدهگی کېلیشماوچیلیکلرنی برطرف اېتیش همده اوروشنی تۉختهتیشگه قرهتیلگن مذاکرهلرنینگ نوبتدهگی مهم باسقیچیگه مېزبانلیک قیلگن.
