انسان حقوقلری تشکیلاتی «رواداری» پاکستان نینگ افغانستان نینگ پکتيا، پکتیکا و کنر ولایتلریگه اویوشتیرگن سۉنگّی هجوملرینی قارهلب، تورر جای حدودلرینی نشانگه آلیش و تینچ اهالیگه تلفات یېتکزیش اوروش جنایتی دېب بهالنیشی ممکنلیگینی بیلدیردی.
تشکیلات بوگون (سهشنبه، ۹-سرطان) اعلان قیلگن بیاناتیده، آلینگن معلوماتلر و قربانلر عایله اعضالری بیلن اۉتکزیلگن صحبتلرگه کۉره، پاکستان هجوملری تورر جای حدودلریگه قرهتیلگنینی معلوم قیلدی.
جملهدن، پکتيا ولایتیده کېتمه-کېت ایکّی هجوم عملگه آشیریلگن. بیرینچی هجومده تورر جایلر نشانگه آلینگن، ایکّینچی هجومده اېسه یاردم کۉرسهتیش اوچون بارگن شخصلر ضربهگه اوچرهگن.
بو اېسه تینچ اهالی آرهسیدهگی قربانلر سانینینگ آرتیشیگه سبب بۉلگن. «رواداری»نینگ تأکیدلشیچه، تورر جای حدودلریگه هجوم قیلیش و تینچ اهالیگه تلفات یېتکزیش خلقارا انسانلر حقوقینینگ آچیقدن-آچیق بوزیلیشی حسابلنهدی همده اوروش جنایتی صفتیده بهالنیشی ممکن.
تشکیلات، شونینگدېک، تینچ اهالی و قوتقرووچیلرنی نشانگه آلیش خلقارا انسان حقوقدهگی اجرهتیش، احتیاطکارلیک و ضرورت تمایللرینی، شونینگدېک جنیوا کانوانسیونلرینی بوزیشینی قید اېتدی.
بیاناتگه کۉره، قوراللی ماجرالرنی ترتیبگه سالووچی خلقارا حقوق اساسیده ماجرا تامانلری حربي و فقرالیک اۉبژېکتلرینی بیر-بیریدن اجرهتیشی همده، اینیقسه تینچ اهالیگه ضرر یېتکزیلیشینی کمهیتیریش اوچون برچه ممکن بۉلگن احتیاط چارهلرینی کۉریشی شرط.
«رواداری» خلقارا همجمعیت و خلقارا تشکیلاتلردن اوشبو واقعهلرنی پُخته حجتلشتیریشنی، عیبدارلرنی محکمه جوابگرلیگیگه تارتیش بۉییچه شاشیلینچ چارهلر کۉریشنی همده بوندهی هجوملرنینگ تکرارلنیشی نینگ آلدینی آلیش اوچون ثمرهلی چارهلر کۉریشنی سۉردی.
پاکستان جاري هفته نینگ یکشنبه آقشامیده ینه افغانستان نینگ پکتيا، پکتیکا و کنر ولایتلریدهگی نشانلرگه ضربه بېریب، تحریک- طالبان پاکستان (تیتیپی) و «جماعت اولاحرار» گروهی موضعلرینی نشانگه آلگنینی دعوا قیلدی.
طالبان اېسه هجوملرده تینچ اهالی نینگ اویلری نشانگه آلینگنینی، عاقبتده۳۶ کیشی هلاک بۉلگنی و ینه۱۶۳ کیشی جراحت آلگنینی بیلدیردی.
بیرلشگن ملتلر تشکیلاتی نینگ افغانستاندهگی یاردم ادارهسی (یوناما) اوشبو هجوملرده۲۸ نفر تینچ اهالی هلاک بۉلگنی و ینه۴۹ نفری جراحتلنگنینی تصدیقلهدی.
یوناما معلوماتیگه کۉره، قربانلر آرهسیده عیاللر و بالهلر هم بار. مذکور هجوملر طالبلر و پاکستان اۉرتهسیدهگی کېسکینلیک دوام اېتهیاتگن بیر پیتده صادر بۉلدی.
پاکستان جاري ییل فبروری آییده طالبان بیلن ماجرالر کوچهیگنیدن بویان افغانستان نینگ تورلی ولایتلریگه بیر نېچه بار هوا و راکت هجوملری اویوشتیرگن. اوشبو هجوملر عاقبتیده یوزلب تینچ اهالی هلاک بۉلگن یاکه یرهلنگن.
