باميان ولایتینینگ پنجاب اولسواللیگیدهگی منطقهلرگه کۉچیلر پادهلری باستیریب کیرگنیدن سۉنگ، طالبلر ولایتی حاکمی باشچیلیگیدهگی هیئت یکوني قرار چیقریلگونیگه قدَر هېچ کیم بحثلی ییلاولرگه اۉز چارواسینی آلیب کیریشگه حقلی اېمسلیگی حقیده قرار چیقردی.
طالبلر ایچکی ایشلر وزیرلیگی بوگون (چهارشنبه، ۱۰سرطان) اعلان قیلگن بیاناتیده پنجاب اولسواللیگیده کۉچیلر و محلي اهالی اۉرتهسیدهگی نزاعنی حل اېتیش اوچون هیئت یوباریلگنینی معلوم قیلدی.
وزیرلیککه کۉره، هیئت ترکیبیگه باميان ولایتی حاکمی گُل حیدر شفق، ولایت پولیس باشلیغی حبیبالله شاکر، استخبارات باشلیغی خلیلالرحمان حذیفه همده طالبلرنینگ چېگره و قبیلهلر بۉییچه مسوولی محبالله سجاد کیرگن.
بیاناتده ایتیلیشیچه، هیئت پنجاب اولسواللیگیگه تشریف بویورگچ، ماجرا تامانلری بیلن قۉشمه ییغیلیش اۉتکزیب، بحثلی حدودلرنی پُخته اۉرگنیش ضرورلیگینی تأکیدلهگن.
طالبلر هیئتی کۉچیلر و محلي اهالیگه: «یکوني قرار قبول قیلینمهگونچه، هېچ کیم اۉز چارواسینی بحثلی حدودلرگه آلیب کیریشگه حقلی اېمس»، دېب بیلدیرگن.
هیئت اوشبو مسأله اسلام شریعتی حکملری همده ایشانچلی دلیل و حجتلر اساسیده حل اېتیلیشینی وعده قیلگن.
شو بیلن بیرگه، محلي اهالی کۉچیلر یوزلب و مینگلب باش چاروا بیلن هزارهجات منطقهلریگه، جملهدن باميانگه باستیریب کیرهیاتگنیدن شکایت قیلماقده.
محلي منبعلر اطلاعات روز گزېتهسیگه سۉنگّی ایکّی هفته ایچیده کۉچیلر پنجاب اولسواللیگینینگ «قلعچه کیرمان»، «کرول»، «پای کۉتل جمالي» و «سرخ نوکر دوله» قیشلاقلریگه کیریب، قریب 25 ته پادهنی محلي اهالینینگ ییلاولریگه قۉییب یوبارگنینی ایتگن.
اهالی نینگ اعتراضیدن سۉنگ کۉچیلر پادهلر طالبلر باش وزیری نینگ اقتصادي مسألهلر بۉییچه اۉرینباسری ملا عبدالغنی برادرگه تېگیشلی اېکنینی همده اولر هبتالله آخوندزاده و طالبان نینگ چېگرهلر، قبیلهلر و اېلتلر وزیرلیگیدن بو حدودلرده ییلاودن فایدهلنیش بۉییچه رخصت آلگنینی دعوا قیلگن.
باميانلیکلرنینگ ایتیشیچه، چاروالرینی آدملرنینگ ییلاو و اېکین میدانلریگه هَیدهب کېلهیاتگن کۉچیلر قوراللنگن بۉلیب، هر قندهی ناراضیلیککه اۉق اوزیش و کلتکلش بیلن جواب بېرماقده.
جاري ییل نینگ 26-جوزا کونی قوراللنگن کۉچیلر پنجاب اولسواللیگیدهگی «توبک» و «پشته غرغری» قیشلاقلریده پادهلرینی محلي اهالی نینگ اېکین میدانلریگه قۉییب یوبارگن. ناراضیلیک بیلدیرگن محمدحسین، جعفر و علیداد اسملی اوچ کیشی اېسه اۉلیم درجهسیگچه کلتکلنگن.
شونینگدېک، 16-جوزا کونی «زرسنگ» قیشلاغیده قوراللنگن کۉچیلر نعیم، مهدي، حبیب، ابراهیم و حاجی اسحاق اسملی بېش کیشینی هم کلتکلهگن.
طالبلرنینگ چېگرهلر، قبیلهلر و اېلتلر وزیرلیگی 27-جوزا کونی محلي مسووللردن عبارت هیئت یوباریلگنی و کۉچیلر همده محلي اهالی اۉرتهسیدهگی معما حل اېتیلگنینی اعلان قیلگن اېدی.
بیراق، محلي منبعلرگه کۉره، بو سفر ملا برادرگه تېگیشلی اېکنی ایتیلهیاتگن و طالبلر رهبریدن ییلاو رخصتینی آلگن پادهلرنینگ ینه منطقهگه کیریشی ماجرانی قَیته اوج آلدیرگن.
