ناتو باش کاتبی مارک روته امریکانینگ ایرانگه قرشی عملگه آشیرگن ینگی هجوملرینی قۉللب-قوّتلب، اولرنی “مطلقا ضرور” دېب بهالهدی.
مارک روته بوگون (۱۷-سرطان، چهارشنبه) تورکيه نینگ انقره شهریده اۉتکزیلگن مطبوعات انجمنیده ایراننی اۉت آچیشنی تۉختهتیش کېلیشووینی بوزیشده عیبلهدی.
او شوندهی دېدی: “مېنیمچه، بو حرکت مطلقا ضرور اېدی. چونکه اۉت آچیشنی تۉختهتیش کېلیشووی عمل قیلهیاتگن بیر پیتده ایران عملده اونی بوزماقده. کېچه کېمهلرگه قیلینگن هجوم بونگه مثال بۉلدی. شو سببلی امریکا نینگ قطعي جواب قَیتریشی جوده مهم اېدی.”
شو بیلن بیرگه، ایران سۉنگگی۲۴ ساعت ایچیده هرمز بۉغازیده کېمهلرگه اویوشتیریلگن بیرار هجوم اوچون جوابگرلیکنی اۉز ذمّهسیگه آلمهگن.
بیراق امریکا مرکزي قوماندانلیگی (ستنکام) نینگ معلوم قیلیشیچه، مارشالل آراللری، سعوديه عربستانی و لیبريا بیراقلری آستیده سوزهیاتگن اوچته نفت تانکېری هرمز بۉغازیدن اۉتیش وقتیده ایران تامانیدن هجومگه اوچرهگن.
امریکا بوگون تانگده ایرانگه قرشی ینگی حربي عملیاتنی باشلب، هرمزگان ولایتیدهگی بندر عباس و سِریک حدودلریدهگی 80 ته نشانگه ضربهلر بېرگن.
ایران اسلام انقلابی قۉریقچیلری کارپوسی (سپاه) اېسه هوا هجومیدن مدافعه عملیاتی دوامیده امریکاگه تېگیشلی کیو۹ اوچووچیسیز اوچیش دروننی اوریب توشیرگنینی دعوا قیلدی.
سپاه، شونینگدېک، امریکانینگ ینگی هجوملریگه جوابن بهرین و کویتدهگی امریکا حربي بزهلریگه قرهشلی 85 ته نشانگه ضربهلر بېرگنینی معلوم قیلدی.
