امریکا مرکزي قوماندانلیگی (سنتکام) بوگون تانگده (۱۷سرطان، چهارشنبه) اېران حدودیدهگی ۸۰ته نشانگه هوا هجوملری اویوشتیریلگنینی معلوم قیلدی.
سنتکام ایکس اجتماعي ترماغیده نشر قیلگن بیاناتیده اوشبو هجوملر ایراننینگ سۉنگّی کونلرده هرمز بۉغازی آرقهلی اۉتهیاتگن تجاري کېمهلرگه اویوشتیرگن هجوملریگه جوابن عملگه آشیریلگنینی بیلدیردی.
بیاناتگه کۉره، ینگی ضربهلر دوامیده ایراننینگ هوا مدافعهسی تیزیملری، قوماندانلیک و باشقروو ترماقلری، قیرغاقدهگی رادار اۉبژېکتلری، کېمهلرگه قرشی راکت صلاحیتی همده اسلام انقلابی قۉریقچیلری (سېپاه) گه قرهشلی هرمز بۉغازی و اونینگ اطرافیدهگی۶۰ دن آرتیق کیچیک حربي قَییق یوقاری انیقلیکدهگی باشقریلهدیگن اۉق-داریلر بیلن نشانگه آلینگن.
سنتکام نینگ تأکیدلشیچه، عملیاتدن کۉزلنگن اساسي مقصد ایراننینگ هرمز بۉغازیده تجاري کېمهلرگه هجوم قیلیش امکانیتینی چېکلش بۉلگن.
امریکا مرکزي قوماندانلیگی ایراننی سۉنگّی کونلرده هرمز بۉغازیدن اۉتهیاتگن اوچته تجاري کېمهگه هجوم اویوشتیرگنلیکده عیبلهدی.
قوماندانلیک معلوماتیگه کۉره، «الرقیات» نفت تانکری (مارشالل آراللری بیراغی آستیده)، «ودیان» نفت تانکېری (سعوديه عربستانی بیعراغی آستیده) همده «سایپرس پراسپریتی» نفت تانکری (لیبريا بیراغی آستیده) هرمز بۉغازیدن اۉتهیاتگن وقتده هجومگه اوچرهگن.
بیراق ایران رسميلری حاضرگچه اوشبو اوچ حادثه نینگ بیرارتهسی اوچون جوابگرلیکنی اۉز ذمّهسیگه آلمهگن.
امریکا اوچته تجاري کېمهگه قیلینگن هجوملرگه جوابن ایران نفتیگه نسبتاً اوّل بېکار قیلینگن چېکلاولرنی قَیته تیکلهگنینی هم معلوم قیلدی.
ایران تشقی ایشلر وزیرلیگی اېسه امریکانینگ ینگی چارهلرینی ایکّی دولت اۉرتهسیدهگی اسلام آباد کېلیشووینینگ جدّي بوزیلیشی دېب بهالهدی.
ایران تشقی ایشلر وزیری اۉرینباسری کاظم غریبآبادی ایکس اجتماعي ترماغیده شوندهی یازدی: “امریکانینگ ایران نفتی سوداسیگه عاید چېکلاولرنی قَیته جاري اېتیشی کېلیشوونینگ ۱۰بندینی آچیقدن-آچیق بوزیشدیر. شونینگدېک، بو مملکت نینگ ایرانگه قرشی کېینگی حربي عملیاتلری هم اسلام آباد کېلیشووینینگ۱ و۲بندلری نینگ جدّي بوزیلیشی حسابلنهدی.”
اونینگ قۉشیمچه قیلیشیچه، امریکا سۉنگّی اوچ هفته دوامیده هم اسرایل نینگ لبناندهگی حرکتلری و ایرانگه نسبتاً تهدیدلی بیاناتلری آرقهلی شرطنامهنینگ۱ و ۲-بندلرینی بیر نېچه بار بوزگن.
کاظم غریبآبادی امریکانی کېلیشوونی بوزیش عاقبتلریدن آگاهلنتیریب، ایران اۉز ملي منفعتلری و خوفسیزلیگینی حمایه قیلیش اوچون قطعي چارهلر کۉریشینی تأکیدلهدی.
