ایران تشقی ایشلر وزیرلیگی امریکا بوگون تانگده (۱۷-سرطان، چهارشنبه) بیرلشگن ملتلر تشکیلاتی منشوری و اوروشنی یکونلش بۉییچه توزیلگن شرطنامهنی بوزگن حالده مملکت جَنوبي ساحللریدهگی بیر نېچته کوزهتوو مرکزلریگه ضربه بېرگنینی معلوم قیلدی.
وزیرلیک بیاناتیده ایتیلیشیچه، امریکانینگ ناقانوني هجوملرینی تکرارلشی، ایران نفتینی ساتیشگه بېریلگن رخصتنی بېکار قیلیشی، هرمز بۉغازیدهگی “اېران ترتیبلری”نی بوزیشی همده اسرایل نینگ لبنانگه هجوملری دوام اېتهیاتگنی اوروشنی توگهتیش بۉییچه کېلیشوونینگ مهم بندلرینی عملده بېکار قیلگن.
ایران تشقی ایشلر وزیرلیگی شوندهی دېدی: “تنگلیک نینگ بوندهی خوفلی درجهده کوچهییشی عاقبتلری اوچون جوابگرلیک وعدهسیگه و کېلیشوویگه صادق قالمهگن امریکا ذمّهسیگه توشهدی.”
وزیرلیک، شونینگدېک، منطقه دولتلرینی آگاهلنتیریب، ایرانگه قرشی تجاوزده هر قندهی همکارلیک جنایتگه شریکلیک صفتیده بهالنیشینی تأکیدلهدی.
بیاناتده ایران قوراللی کوچلری “تجاوز منبعی و باشلنیش نقطهسی”نی هم نشانگه آلیشی ایتیلگن.
امریکا بوگون تانگده ایراننی هرمز بۉغازیده تجاري کېمهلرگه هجوم قیلگنلیکده عیبلب، مملکت جَنوبیدهگی بیر قطار نشانلرگه ضربهلر بېرگن اېدی.
ایران اسلام انقلابی قۉریقچیلری (سپاه) اېسه بونگه جوابن فارس کۉرفزیدهگی امریکا حربي بزهلرینی نشانگه آلگنینی معلوم قیلدی.
بو اوروشنی توگهتیش بۉییچه شرطنامه امضالنگنیدن کېین امریکا و ایران اۉرتهسیدهگی اېنگ سۉنگگی حربي کېسکینلیکلردن بیری بۉلدی.
بوندن آلدین هم هر ایکّی تامان بیر-بیرینی اۉت آچیشنی تۉختهتیش کېلیشووینی بوزگنلیکده عیبلب، اۉز ارا هجوملر اویوشتیرگن اېدی.
