بیرلشگن ملتلر تشکیلاتینینگ افغانستاندهگی یاردم ادارهسی (یوناما) نینگ معلوم قیلیشیچه، طالبان نینگ حربي محکمهلری اوشبو گروه خوفسیزلیک کوچلری اوستیدن بېریلگن شکایتلرنی قبول قیلیشدن باش تارتماقده، کۉریب چیقیلگن ایشلر اېسه کېینچهلیک یاپیب یوباریلماقده.
یوناما بوگون (دوشنبه،۱۹ اسد) طالبان نینگ افغانستانده حاکمیتنی قَیته اېگهلهگنینینگ بېش ییللیگی عرفهسیده «افغانستانده خوفسیزلیک سکتوری جوابگرلیگی» ناملی حساباتینی اعلان قیلدی. حسابات سۉنگگی بېش ییلنی قمرهب آلهدی.
یوناما اۉز تېکشیروولری دوامیده انیقلشیچه، طالبان حربي محکمهلری اوشبو گروه خوفسیزلیک خادملریگه قرشی یازمه شکایتلرنی قبول قیلیشنی رد اېتماقده و شکایتچیلرگه «مجاهدلر» اوستیدن محکمهلرگه مراجعت قیلمسلیک توصیه قیلینماقده.
یونامانینگ قید اېتیشیچه، بو حالت جزاسیزلیک محیطی نینگ ینهده کوچهییشیگه خدمت قیلماقده.
حساباتگه کۉره، اَیریم حاللرده شکایتلر رۉیخطگه آلینیب، طالبلر خوفسیزلیک خادملری حبسگه آلینگن بۉلسه هم، اولر واسطهچیلیک آرقهلی آزاد اېتیلگن و ایشلر یاپیلگن.
یوناما حساباتیده شوندهی دېییلهدی: «بعضی حاللرده عملدهگی حاکمیتنینگ خوفسیزلیک خادملری تورلی جنایتلرنی صادر اېتگنلیکده عیبلنیب حبسگه آلینگن، اَیریملری حتا حکم قیلینگن. بیراق کېینچهلیک، عادتده محکمه توصیهسی اساسیدهگی واسطهچیلیکدن سۉنگ آزاد قیلینگن.»
یوناما نینگ تأکیدلشیچه، بوندهی حالتلرده دستلبکی تېرگاو یاکه محکمه جریانی دوامیده ایشلر نینگ نیمه سببدن توگهتیلگنی یاکه رد اېتیلگنی حقیده هېچ قندهی اساسلنتیریلگن معلومات موجود اېمس. شونینگدېک، بو قرارلر عامهگه اعلان قیلینمهیدی و منتظم روشده حسابات هم بېریلمهیدی.
یوناما سرپرستی جورجیت گانیون نینگ ایتیشیچه، شکایتلر، تېرگاولر، اولرنینگ نتیجهلری و جوابگرلیککه تارتیش جریانلری حقیده شفّاف معلومات یۉقلیگی سببلی اوشبو تیزیملر نینگ حقیقي جوابگرلیک درجهسینی بهالش نینگ امکانی یۉق.
او شوندهی دېدی: «قبول قیلینگن شکایتلر، اۉتکزیلگن تېرگاولر همده عملدهگی حاکمیت نینگ تېگیشلی اۉرگانلری تامانیدن قۉللنگن انتظامي یاکه محکمه چارهلریگه عاید عامهوي معلوماتلر نینگ چېکلنگنلیگی ایشانچنی ضعیفلشتیرهدی و حقوقبوزرلیکلرنینگ آلدینی آلیش تأثیرینی کمهیتیرهدی.»
گانیون طالباننی اۉز خوفسیزلیک ادارهلری اوستیدن توشگن شکایتلر بۉییچه جوابگرلیک تیزیمینی یخشیلشگه چقیردی.
اونینگ سۉزلریگه کۉره: «جوابگرلیکنی کوچهیتیریش عملدهگی حاکمیت نینگ حقوقي مجبوريهتیدیر. بو باشقروونی یخشیلش و انسان حقوقلریگه حرمتنی تأمینلش یۉلیدهگی مهم قدم بۉلیب، هر ایکّی عامل افغانستان برقرارلیگی همده مملکت نینگ خلقارا مجبوريتلریگه رعایه اېتیشی و خلقارا همجميتگه قَیته انتیگراسیونلشووی اوچون مهم اساس حسابلنهدی.»
یوناما نینگ تأکیدلشیچه، طالبان خوفسیزلیک ادارهلری نینگ حقوقبوزرلیکلریگه عاید شکایتلرنی کۉریب چیقیش جریانی «شفّاف، تېکشیریلیشی ممکن بۉلگن و یېترلی» درجهده اېمس.
شو باعث تشکیلات شکایتلرنی کۉریب چیقیش اوچون «همه اوچون آچیق، خوفسیز و اینکلیوزیو میکانیزملر» یرهتیلیشینی طلب قیلماقده. بو برچه انسانلرگه، جنسیدن قطعی نظر، اۉز خواطرلرینی «قصاص آلیش یاکه کمسیتیلیشدن قۉرقمسدن» بیلدیریش امکانینی بېریشی کېرهک.
یوناما، شونینگدېک، طالبان خوفسیزلیک ادارهلری اوستیدن بېریلگن شکایتلرده اشتراک اېتهیاتگن جبرلنووچیلر، گواهلر و حقوقبوزرلیکلرنی فاش قیلووچیلر نینگ حمایهسی هم تأمینلنیشی ضرورلیگینی علیحده تأکیدلهدی.
