هراتدهگی منبعلر اوشبو ولایتده طالبلر امنیه قوماندانلیگی یقینیده بیر یاش ییگیت آتیب اۉلدیریلگنینی تصدیقلهدی.
منبعلرگه کۉره، بو ییگیت نعمان اسملی بۉلیب، هرات ولایتی سابق کېنگشی اعضاسی عبدالرحمن مرادینینگ اۉغلی اېدی. عبدالرحمن مرادی هم ایکّی ییل آلدین اۉز اوییده اۉلدیریلگن.
منبعلرنینگ ایتیشیچه، نعمان اوّل آنهسی بیلن بیرگه آتهسی عبدالرحمن مرادينی اۉلدیریشده عیبلنیب حبسگه آلینگن. نعماننینگ آنهسی اېسه اۉتگن هجري-شمسي ییل نینگ میزان آییده هراتدهگی طالبان محکمهسیده آتیب اۉلدیریلگن. نعماننینگ اۉزی اېسه آتهسینی اۉلدیریش عیبیدن آقلنگن اېدی.
منبعلرگه کۉره، نعمان دوشنبه کونی (۱۹ اسد) اۉز ایشینی کوزهتیب باریش اوچون هراتدهگی طالبلرنینگ امنیه قوماندانلیگیگه بارگن. او بنادن چیققنیدن سۉنگ، باشقرمه بناسیدن بیر نېچه متر نریده قوراللنگن شخصلر تامانیدن آتیب اۉلدیریلگن.
حاضرگچه قاتللیک سببی و اونی صادر اېتگن شخصلر انیقلنمهگن. هراتدهگی طالبلرنینگ محلي رسميلری هم حاضرگچه بو بارهده ایضاح بېرمهگن.
نعماننینگ آته-آنهسی اۉلدیریلیشی واقعهسی
هرات ولایتی کېنگشینینگ سابق اعضاسی عبدالرحمن مرادی ۱۴۰۳-ییل ۲۱-جدي کونی هرات شهرینینگ بېشینچی ناحیهسیدهگی ۶۴مترلیک یۉلده جایلشگن اوییده اۉلدیریلگن. اۉشه پیتده اونینگ اۉلیمی «قورالنی تازهلش وقتیده تصادفهن اۉق اوزیلیشی» نتیجهسیده یوز بېرگنی ایتیلگن. کېینچهلیک طالبانلر اونینگ خاتینی و اۉغلینی قاتللیکده عیبلب حبسگه آلگن.
عبدالرحمن مرادينینگ خاتینی ۱۴۰۴-ییل ۵-میزان کونی طالبلرنینگ استیناف محکمهسی مجلسی یکونلنگنیدن سۉنگ، محکمه بناسی حدودیده آتیب اۉلدیریلگن.
شوندن سۉنگ منبعلر طالبلر محکمهسی بو عیالنی آقلهگنینی و او آزاد اېتیلگنیدن کېین عبدالرحمن مرادینینگ اوکهسی تامانیدن اۉلدیریلگنینی بیلدیرگن.
اۉشه وقتده منبعلر اوشبو عیال نینگ بیاناتلرینی هم ترقهتگن اېدی. او اېرینینگ اۉز جانیگه قصد قیلگنینی ایتگن و عبدالرحمن مرادي آتهسی نینگ باسیمی آستیده بۉلگنینی بیلدیرگن.
عبدالرحمن مرادینینگ آتهسی شېر احمدخان علیزایی، «ارباب شیر» نامی بیلن مشهور بۉلیب، هراتدهگی محلي نفوذلی شخصلردن بیریدیر.
