غزنی ولایتینینگ قرهباغ اولسواللیگی باغ عطّار و گُل کۉه منطقهسی اهالیسی طالبلر اولرنینگ خصوصي قیشلاق خۉجهلیگی یېرلرینی «دولت یېرلری» نامی آستیده مصادره قیلیب، اونینگ بیر قِسمیده شهرچه قورهیاتگنی، قالگن قِسمینی اېسه اجارهگه بېرماقچی اېکنینی اَیتماقده.
اولر طالبلر ادارهلریگه یوبارگن بیر نېچه عریضهلریده بو یېرلر میراثي اېکنینی و اولرده قباله همده شرعي حجتلر موجودلیگینی بیلدیرگن. باغ عطّار و گُل کۉه اهالیسی سالیق تۉلگنلیکلرینی تصدیقلاوچی حجتلرگه هم اېگه بۉلیب، اولرنینگ نسخهلرینی اطلاعات روزگه یوبارگن.
باغ عطّار و گُل کۉه اهالیسی طالبلرحجتلرنی تېکشیرمسدن و دعوانی محکمه آرقهلی کۉریب چیقمسدن توریب، یېرلرنی مصادره قیلگنینی اَیتماقده.
اهالینینگ عریضهلریده بو یېرلر نینگ میدانی بیرمینگ 800 جېریب دېب کۉرسهتیلگن. بیراق بیر منبع یېرلرنینگ عمومي میدانی قریب ۲۰۰۰جېریب اېکنینی ایتگن.
طالبلرنینگ امر به معروف و نهي از منکر وزیرلیگیگه یوباریلگن عریضهده بو یېرلر آته-بابالریدن میراث قالگنلیگی و اولرده شرعي حجتلر موجودلیگی قید اېتیلگن. باغ عطّار و گُل کۉه اهالیسی 1327-هجري شمسي ییلدن بېری قباله و شرعي حجتلرگه اېگه اېکنینی بیلدیرگن.
عریضهده ایتیلیشیچه، شونگه قرهمهی، قرهباغ تومنیدهگی مهاجرلر ریاستی هېچ قندهی شرعي اساس بۉلمهگن حالده اوشبو یېرلرنی اېگهللب آلگن.
منبعگه کۉره، طالبلر افغانستانده حاکمیتنی اېگهلهگن دستلبکی دورده باغ عطّار و گُل کۉه یېرلرینی دولت یېرلری صفتیده اېگهللب، او یېرده شهرچه قوریشنی باشلهگن. منبع نینگ ایتیشیچه، اۉشه پیتده بو شهرچه پاکستانلیک طالبان اعضالری اوچون قوریلهیاتگنی ایتیلگن.
منبع طالبلر یقینده اوشبو یېرلرنینگ قالگن قِسمینی هم «دولت یېری» صفتیده اجارهگه بېریش اوچون سوداگه قۉیماقچی اېکنینی بیلدیرگن.
اونینگ ایتیشیچه، بو مسأله گُل کۉه قیشلاغی اهالیسی ناراضیلیگیگه سبب بۉلگن. اولر بیر نېچه بار تورلی ادارهلرگه مراجعت قیلگن، بیراق نتیجه چیقمهگن.
طالبلر شو پیتگچه «دولت یېرلری» دېگن نام آستیده بیر نېچه شهرچه و مینگلب جېریب یېرلرنی مصادره قیلگن.
بو گروه یقینده کابل غربیدهگی امید سبز شهرچهسی اهالیسی همده غزنیدهگی شهرک نوآباد شهرچهسی اهالیسیگه هم اوی-جایلرینی ترک اېتیش حقیده بویروق بېرگن.
