افغانستان خبرچیلر مرکزینینگ خبر بېریشیچه، طالبلر حکمرانلیگینینگ بېشینچی ییلی دوامیده خبرچیلر و یېتکرمهاېرکینلیگی بوزیلیشی بیلن باغلیق ۱۰۰ دن آرتیق مورد قید اېتگن.
مرکز بوگون (پنجشنبه، ۲۲-اسد) اعلان قیلگن گزارشیده طالبان ۱۴۰۰-ییل اسدده حاکمیتگه قَیتگنیدن بېری افغانستانده یېتکرمه فعالیتی اوچون محیط کېسکین چېکلنگنینی بیلدیرگن.
مرکز ژورنالیستلر تدقیقاتلریگه کۉره، سۉنگگی بیر ییل ایچیده مملکتده مدیا اېرکینلیگی بحرانی ینه-ده چوقورلشگن. طالبلر سۉز و یېتکرمه اېرکینلیگی اوچون موجود بۉلگن اېنگ کیچیک امکانیتلرنی هم یاپیشگه حرکت قیلگن.
مرکز سۉنگگی ۱۲آیده مدیا اېرکینلیگی بوزیلیشی نینگ کمیده ۱۰۲ ته موردینی قید اېتگن. آماری جهتدن بو کۉرستکیچ طالبان حکمرانلیگی نینگ تۉرتینچی ییلیده قید اېتیلگن ۱۹۰ته حالتگه نسبتاً دېیرلی ایکّی برابر کمهیگن بۉلسه-ده، مرکزگه کۉره، تضییق نینگ ماهیتی جهتیدن وضعیت یخشیلنمهگن، عکسینچه، باسیم و چېکلاولر کوچهیگن.
مرکز اۉتگن ییل اسد آییدن بېری۱۵ نفر ژورنالیست و مدیا خادیمی حبسگه آلینگنینی قید اېتگن. اوشبو آمارگه کیریتیلمهگن ینه اوچ ژورنالیست و مدیا فعالی بیر ییلدن آرتیق وقت دوامیده قماقده بۉلیب، جزا مدتینی اۉتهماقده.
اوشبو معلوماتلرگه کۉره، شو دورده کمیده۲۹ ته یېتکرمه، میدیا و ژورنالیست تشکیلاتی یاپیلگن یاکه حکمران مأموریت نینگ میدیا سیاستیگه رعایه قیلمهگنی سببلی اولر نینگ فعالیت حجتینی بېکار قیلینگن.
مرکز معلوماتلریگه کۉره، سۉنگگی بیر ییل ایچیده تیریک موجوداتلر نینگ تصویرلرینی نشر قیلیشگه قۉییلگن رسمي تعقیق ینه بېش ولایتده بلخ، هرات، پکتیا، ارزگان و کاپیساده جاري اېتیلگن. اوشبو جریان ۱۴۰۳-ییلده باشلنگنیدن بویان مملکتدهگی ۳۴ولایت نینگ ۲۵ تهسیده مذکور چېکلا رسماً اعلان قیلینگن.
مرکزنینگ ایتیشیچه، ویدیو لوحه تیارلش یاکه ویدیو اینترویو آلیشگه قۉییلگن چېکلاو هم قریب ۴۰ته وزیرلیک و دولت ادارهسیده جاري اېتیلگن.
بوندن تشقری، دولت ادارهلریده خادملر نینگ سمارت فونلردن فایدهلنیشیگه هم تعقیق قۉییلگن. مرکزگه کۉره، بو حالت ژورنالیستلر نینگ مملکتدهگی اخباراتگه کیریش امکانیتلرینی ینه-ده چېکلهگن.
مرکز یېتکرمهگه دستورلر مضمونی بۉییچه باسیم کوچهیگنینی بیلدیرگن. ژورنالیستلر حکمران مأموریت تامانیدن معقوللنمهگن شخصلر بیلن اینترویو قیلیشدن واز کېچیشگه، شونینگدېک، مأموریت نینگ دستورلری یاکه ترغیبات خبرلرینی اېفیرگه اوزهتیشگه مجبور بۉلگن.
کمیده بېش یېتکرمه سیاسي، خوفسیزلیک و اجتماعي واقعهلرنی یاریتیشده یاکه موسیقي موجود دستورلرنی نشراتگه اوزهتیشده استخبارات و امر به معروف ادارهلری نینگ چېکلاوچی بویروقلریگه رعایه قیلمهگنی سببلی فعالیتینی تۉختهتیشگه مجبور بۉلگن.
مرکز، شونینگدېک، عیال ژورنالیستلرگه نسبتاً چېکلاولر و عیاللر آوازینی نشراتگه اوزهتگنی اوچون یېتکرمهگه باسیم کوچهیگنینی قید اېتگن.
اوشبو مرکزنینگ ایتیشیچه، یوقاری مرتبهلی حکمران مأموریت وکیللری نینگ مطبوعات انجمنلریده عیال ژورنالیستلرنینگ آوازی آچیقچهسیگه سانسور قیلینگن یاکه اولرنینگ اَیریم تدبیر و کنفراسلرده قتنهشیشیگه یۉل قۉییلمهگن.
کمیده ایکّی رادیو جانلی نشراتده عیاللرگه تیلفون آرقهلی باغلنیش امکانینی بېرگنی اوچون فعالیتینی تۉختهتیشگه مجبور بۉلگن.
مرکز، شونینگدېک، طالبان ژورنالیستلرنی مجبوري اقرارلر بېریشگه هم جلب قیله باشلهگنینی ایتگن. سۉنگگی بیر ییل ایچیده اوچ ژورنالیست و مېدیا فعالی نینگ مجبوري ویدیو اقرارلری نشر قیلینگن.
مرکزگه کۉره، طالبلرنینگ جنایت کودېکسیده یېتکرمه حقیده تۉغریدن-تۉغری هېچ نرسه دېییلمهگن بۉلسه-ده، او یېتکرمهنی قماق جزاسی کبی آغیر قانوني تهدیدلر و جزالر آستیده قالدیرهدی.
مرکز سۉنگگی بیر ییل ایچیده طالبان مأموریتی ترکیبیده ینگی کوچ شکللنگنینی هم بیلدیرگن. اونگه کۉره، طالبان عدلیه وزیرلیگی استخبارات اداره سی و امر به معروف و نهي از منکر وزیرلیگی بیلن بیر قطارده ینگی رېپرېسسیو توزیلمهگه ایلنگن.
سۉنگگی حالتده اوشبو وزیرلیک خصوصي تمدن تلویزیونی یاپیب، اونینگ مال-ملکینی مصادره قیلگن و ایکّی خادیمینی قماققه تشلهگن.
افغانستان ژورنالیستلر مرکزی خلق ارا همجمعیت و اېرکین یېتکرمهنی قۉللب-قوّتلاوچی خلق ارا تشکیلاتلرنی افغانستاندهگی مېدیا اېرکینلیگیگه رعایه اېتیلیشی مسألهسیده حکمران ادارهگه باسیم اۉتکزیشگه چقیرگن.
مرکز خلق ارا همجمعیتدن افغان ژورنالیستلری و یېتکرمه بیلن بیردملیکده، مملکت ایچیدهگی و خارجدهگی مستقل یېتکرمه همده خوف آستیدهگی ژورنالیستلرگه سیاسي، مالیوي و تخنیکي یاردمنی کوچهیتیریشنی سۉرهگن.
