تاجیکستان حکومتی افغانستان نینگ بدخشان ولایتیدهگی تۉقنهشوولر وقتیده مملکت هوا حدودی بوزیلگنی، بیر نېچته تورر جای ویران بۉلگنی و افغانستان توپراغیدن آتیلگن اۉق تېگیشی عاقبتیده حاملهدار عیال هلاک بۉلگنینی معلوم قیلدی.
تاجیکستان نینگ «آسیا پلس» اخبارات آژانسی خبریگه کۉره، تاجیکستان تشقی ایشلر وزیرلیگی اوشبو واقعهلردن سۉنگ طالبلر حکومتیگه رسمي ناراضیلیک اعتراض یوبارگن.
خبرگه کۉره، واقعه پنجشنبه کونی (۲۲اسد) ساعت تخمیناً۶:۴۰ده تاجیکستان نینگ تاغلی بدخشان مختار ولایتی درواز تومنیگه قرهشلی «دشتک» تورر جای حدودیده صادر بۉلگن.
«آسیا پلس» خبریده ایتیلیشیچه، واقعه وقتیده۲۱ یاشلی یاسمین یتیمزاده افغانستان توپراغیدن آتیلگن اۉق تېگیشی عاقبتیده هلاک بۉلگن.
محلي منبعلر یاسمین نینگ یاش فرزندی بۉلگنی و حاملهدار اېکنینی ایتگن. او اوی یوموشلری بیلن شغللنهیاتگن پیتده دېرَزهدن کیریب کېلگن اۉق اونینگ جگرینی تېشیب اۉتگن. یاسمین محلي شفاخانهگه آلیب کېتیلهیاتگن وقتده وفات اېتگن.
شونینگدېک، تاجیکستان تشقی ایشلر وزیرلیگی نینگ اخبارات باشقرمهسی افغانستان بدخشانیدهگی تاجیکستان بدخشانی بیلن چېگرهداش حدودلرده یوز بېرگن تۉقنهشوولر وقتیده بیر نېچته تورر جای ضرر کۉرگنی و مملکت هوا حدودی هم بوزیلگنینی معلوم قیلگن.
تاجیکستان تشقی ایشلر وزیرلیگی اوشبو واقعهلردن سۉنگ طالبانگه رسمي ناراضیلیک اعتراض یوبارگن، بیراق طالبان حاضرچه بو بارهده رسماً جواب بېرمهگن.
بو آرهده، سۉنگگی کونلرده طالبان کوچلری بدخشان ولایتی نینگ نسی اولسواللیگیده اوشبو گروه نینگ محلي اعضاسی و قوماندانلریدن بیری، حاضرده رسمي لوازمگه اېگه بۉلمهگن جمعهخان فاتح بیلن تۉقنهشگنی خبر قیلینماقده.
کېچه یوز بېرگن تۉقنهشوولرگه عاید تاجیکستان قیزلری تامانیدن تصویرگه آلینگن ویدیولرده طالبانگه تېگیشلی تیک اوچر تاجیکستان بیلن چېگرهداش حدودده، افغانستان حدودیده قولهگنی کۉرینهدی. شونینگدېک، طالبلرنینگ حربي تیک اوچری آمودریا بۉییدهگی تاجیکستان قیشلاغی اوستیدن اوچیب اۉتهیاتگنی هم عکس اېتگن.
