اروپا پارلمانی اعضاسی هانا نیومن طالبلر افغانستانده حاکمیتگه قَیتگنیگه بېش ییل بۉلگن بۉلسه-ده، بو گروه هېچ قندهی اۉزگرمهگنینی، اما اروپا اۉزگرگنینی ایتدی.
نیومن خانیم بوگون جمعه کونی (۲۳-اسد) ایکس اجتماعي ترماغیده یازیشیچه، اروپا «افغانستان فقرالرینی یالغیز قالدیرگن».
او شوندهی دېگن: «بېش ییل اوّل بیز: «افغانلرنی طالباندن قندهی حمایه قیلهمیز؟» دېب سۉرهگن اېدیک. بوگون اېسه کۉپینچه: «افغانلرنی قَیتریش اوچون طالبلر بیلن قندهی همکارلیک قیلهمیز؟» دېب سۉرهیهپمیز. طالبلر اۉزگرمهدی. اما بیز اۉزگردیک و افغانلرنی یالغیز قالدیردیک.»
او ینه شوندهی قۉشیمچه قیلگن: «حرکتلنهیاتگن حربي اوچاقگه یاپیشیب آلگن آدملر، فرزندلرینی تیکنلی سیملر اوستیدن آشیریب بېرهیاتگن آته-آنهلر و طالبلر حکمرانلیگی آستیده اولرنی کوتهیاتگن کېلهجککه قرهگنده بېگانه آدملرگه کۉپراق ایشانهیاتگن انسانلرنینگ تصویرلری هېچ قچان اونوتیلمهیدی.»
اونینگ ایتیشیچه، «۲۰۲۱-ییل ۱۵-اگوست بیز نینگ مغلوبیتیمیز اېدی و بیز بونی بیلردیک».
اروپا پارلمانی اعضاسی اۉشه پیتده آلمان رهبرلری «اخلاقي مسوولیت» حقیده گپیرگنینی، افغانستان خلقینی تشلب قۉیمسلیککه وعده بېرگنینی همده اولرنی حمایه قیلیشگه کفالت بېرگنینی ایتدی. اما بېش ییل اۉتیب، عیاللر و قیزلر منتظم روشده جماعت حیاتیدن چېتلهتیلهیاتگن، مکتبلر، بیلیم یورتلری، ایش جایلری و باغلر عیاللر اوچون یاپیلگن، عامه آلدیده قمچیلش و تاشبۉران قیلیش قَیته جاري اېتیلگن بیر پیتده، اروپا افغانستان فقرالرینی تشلب قۉیگن.
نیومن نینگ تأکیدلشیچه، بو بېپروالیک «تخنیکي مذاکرهلر»، «مهاجرتنی باشقریش» و «قنسوللیک همکارلیگی» نقابی آستیده عملگه آشیریلماقده.
او آلماندهگی افغانستان اېلچیخانهسیده همده مملکت نینگ بن شهریدهگی قنسوللیگیده طالبلر وکیللری نینگ قبول قیلینگنیگه اشاره قیلیب، «بو تخنیکي مسأله اېمس، باسقیچمه-باسقیچ نارمللشتیریش دیر»، دېدی.
اونینگ سۉزلریگه کۉره، حاضر آلمانده یشهیاتگن افغان مهاجرلری پاسپورت، تذکره، محنت حجتلری، نکاح یاکه یشش حجتلرینی آلیش اوچون اۉزلری قاچیب کېتگن رژیم وکیللریگه قرهم بۉلیب قالگن.
هانا نیومننینگ ایتیشیچه، آلمانده حمایه تعقیب قیلووچیلردن آزاد بۉلیشنی انگلهتیشی کېرهک اېدی، بیراق افغانستان فقرالریگه نسبتاً باشقهچه مناسبت قیلیندی و اېندی اولر قۉرقووی آستیده یشهماقده.
اونینگ یازیشیچه، اَیریم افغان فقرالری اونگه برلین اېلچیخانهسی و بن قنسوللیگی نظارتی آرقهلی طالبلر اولر نینگ شخصي معلوماتلریگه اېگه بۉلیشیدن سۉنگ، افغانستاندهگی قرینداشلریگه نسبتاً قۉرقیتیش و باسیم اۉتکزیلیشیدن خواطرده اېکنلیکلرینی ایتگن.
او اروپا اتفاقی نینگ طالبلر بیلن مناسبتلرینی کېسکین تنقید قیلیب، اصلیده اولر «طالبانگه مهاجرتنی نظارت قیلسهلر، اروپاده تأثیر اۉتکزیشلری ممکنلیگی حقیده سیگنال بېرگنینی» ایتدی.
هانا نیومنتأکیدلهگنیدېک، طالبان افغانستانده حاکمیتگه قَیتگنیدن بېش ییل اۉتیب هم اۉز سیاستینی اۉزگرتیرمهگن، اما اروپا نینگ بو گروهگه مناسبتی اۉزگرگن.
اروپا پارلمانی اعضاسی بوندن اوّل هم اروپا اتفاقی نینگ طالبان بیلن مناسبتلرینی بیر نېچه بار تنقید قیلگن. او اروپا کمیسیونی تامانیدن طالبان هیئتسی نینگ بروکسسل گه تکلیف قیلینیشیگه کېسکین قرشی چیققن و اۉتگن آی اوشبو قراری اوچون کمیسیوننی پارلمان آلدیده جواب بېریشگه مجبور قیلیشینی بیلدیرگن.
