ایران تشقی ایشلر وزیرلیگی سۉزلاوچیسی اسماعیل بقایی، طالبلر حکومتینی تن آلیش مسألهسیدهگی قرارنی «حقوقي-سیاسي مسأله» دېب اتهدی و تهران بو بارهده خلاصهگه کېلگن هر قندهی وقتده تېگیشلی قرارنی قبول قیلیشینی ایتدی.
بقایی بوگون، دوشنبه کونی ۲۶ اسد مطبوعات انجمنیده تهران تن آلیش مسألهسیدن قطع نظر، افغانستان بیلن تورلی ساحهلردهگی مناسبتلرینی دوام اېتتیریب کېلهیاتگنینی ایتدی.
او شوندهی دېدی: «تن آلیش مسألهسی حقوقي-سیاسي مسألهدیر. هر قچان خلاصهگه کېلسک، بو بارهده ضرور قرارنی قبول قیلهمیز. اما ایتگنیمدېک، بو مسأله تورلی ساحهلرده مناسبتلریمیزنی دوام اېتتیریشیمیز یاکه اولرنی مستحکملشیمیزگه تۉسقینلیک قیلمسلیگی کېرهک».
بقایی ایران و افغانستان اۉرتهسیدهگی مناسبتلر تورلی ساحهلرده یخشی اېکنینی ایتدی. اونینگ سۉزلریگه کۉره، «ایکّی دولت قۉشنی، مسلمان و سان-سناقسیز مدني همده تاریخي عموميلیکلرگه اېگه. اولر اۉزارا مناسبتلرده بیر-بیری نینگ تشویشلرینی حسابگه آلیشی و تورلی اقتصادي همده تجارت امکانیتلریدن فایدهلنیشی کېرهک».
ایران طالبان افغانستانده حاکمیتنی اېگهلهگنی نینگ دستلبکی دوریده اوشبو گروه بیلن دیپلوماتیک علاقهلر اۉرنهتگن بۉلسه-ده، افغانستانده اینکلیوزیو حکومت توزیلیشینی تأکیدلب کېلگن.
ایراندهگی سیاسي اۉزگریشلردن سۉنگ تهراندهگی عملدهگی حکومت رسميلری افغانستان حکومتی قندهی شکلده بۉلیشی کېرهکلیگی بارهسیده موضوع بیلدیرمهگن.
حاضرده تهران طالبلر بیلن یقین مناسبتلرگه اېگه و اونینگ افغانستاندهگی دیپلوماتیک وکالتخانهلری فعالیت یوریتماقده. شونینگدېک، ایران حدودیدهگی افغانستان دیپلوماتیک وکالتخانهلری هم طالبان دیپلوماتلری تصرفیده.
شونگه قرهمهی، تهران حاضرگچه طالبان حکومتینی افغانستان حکومتی صفتیده رسماً تن آلگنینی اعلان قیلمهگن.
طالبان افغانستانده حاکمیتنی اېگهلهگنیگه بېش ییل بۉلگن بۉلسه-ده، حاضرچه روسيه طالباننی افغانستان حکومتی صفتیده آچیق روشده رسماً تن آلگن یگانه دولت بۉلیب قالماقده.
