پاکستان اخبارات و مطبوعات وزیرلیگی مملکت نینگ افغانستان توپراغیدهگی اَیریم جایلرگه اویوشتیرگن هوا هجوملرینی تصدیقلب، بو هجوملرده پاکستان طالبان حرکتی (تیتیپی) و اونگه علاقهدار گروهلر نینگ بازهلری همده یشیرین جایلری «انیق و تۉغری» نشانگه آلینگنینی معلوم قیلدی.
مذکور وزیرلیک بوگون (دوشنبه، ۳۰ سنبله) بیانات نشر قیلیب، هجوملرده اوچته نشان، جملهدن، خودکوشلیک هجوملرینی عملگه آشیرووچیلرنی تیارلش مرکزی یۉق قیلینگنینی و «بیر نېچه خودکوش»نی هم اۉز ایچیگه آلگن ۲۸ «ترورچی» اۉلدیریلگنینی بیلدیردی.
پاکستان اخبارات و مطبوعات وزیرلیگی، شونینگدېک، اوشبو مرکزلر و یشیرین جایلرده سهقلنگن کتّه مقداردهگی قورال-یراغ و اۉق-داریلر هم یۉق قیلینگنینی قۉشیمچه قیلدی.
وزیرلیک نینگ ایتیشیچه، مذکور هجوملر پاکستان توپراغیده، خصوصاً، خیبر-پختونخوا اهالیسی و حدودلریگه قرشی صادر اېتیلگن بیر نېچه «ترورچیلیک هجومی» آرتیدن عملگه آشیریلگن.
طالبان اوّلراق پاکستان بوگون تانگده کنر و پکتیکا ولایتلریدهگی «فقرالیک نشانلری»نی بامباردمان قیلگنینی معلوم قیلگن اېدی.
طالبان مطبوعات کاتبی ذبیحالله مجاهدنینگ ایتیشیچه، کنر ولایتیده اوچ کیشی، جملهدن بیر عیال هلاک بۉلگن، ینه ایکّی کیشی یرهلنگن. بیراق پکتیکا ولایتیگه اویوشتیریلگن هجوم عاقبتیده قربانلر بۉلمهگن.
اونینگ قۉشیمچه قیلیشیچه، طالبان کوچلری بو «تجاوز»گه مناسب جواب بېرهدی.
پاکستان.نینگ افغانستانگه نوبتدهگی هوا هجومی خیبر-پختونخوا ولایتی نینگ کوهات تومنیدهگی بیر پولیس مجموعهسیگه اویوشتیریلگن، ۳۱کیشی نینگ، جملهدن ۱۶ نفر پولیس خادیمی نینگ اۉلیمیگه و ۱۰۰ دن آرتیق کیشی نینگ یرهلنیشیگه سبب بۉلگن قانلی هجومدن ایکّی کون اۉتیب عملگه آشیریلدی.
مذکور هجوم اوچون حافظ گُل بهادر باشچیلیگیدهگی «اتحاد المجاهدین» گروهی جوابگرلیکنی اۉز ذمّهسیگه آلگن. پاکستان رسميلری بو گروه افغانستان حدودیده موجود و فعالیت یوریتیشینی بیر نېچه بار دعوا قیلگن.
پاکستان: افغانستاندهگی هجوملرده ۲۸ ترورچی اۉلدیریلدی
بدون دیدگاه
بدون دیدگاه
