بیرلشگن ملتلر تشکیلاتی نینگ افغانستاندهگی یاردم ادارهسی (یوناما) بوگون (دوشنبه، ۳۰-سنبله) تانگده کنر ولایتیده صادر بۉلگن «احتمالي هوا هجوملری» عاقبتیده کمیده اوچ نفر تینچ اهالی جملهدن بیر اېرکک، بیر عیال و بیر قیز هلاک بۉلگنینی تصدیقلهدی.
یوناما ایکس ترماغیده بیانات نشر قیلیب، اوشبو هجوملرده ینه تۉرت نفر تینچ اهالی یرهلنگنینی معلوم قیلدی.
بیرلشگن ملتلر تشکیلاتی نینگ افغانستاندهگی یاردم ادارهسی جاري ییل باشیدن بویان افغانستانده قوراللی زۉرآورلیکلر عاقبتیده ۱ مینگ ۱۰۰ نفردن آرتیق آدم هلاک بۉلگن یاکه یرهلنگنینی قید اېتگنینی بیلدیردی.
یوناما ینه بیر بار «تینچ اهالی آرهسیده قربانلر بۉلیشی نینگ آلدینی آلیش اوچون خلقارا گومانیتار حقوققه رعایه قیلیش ضرورلیگی»نی تأکیدلهدی.
طالبلر نینگ ایتیشیچه، پاکستان بوگون تانگده کنر و پکتیکا ولایتلریدهگی «تینچ اهالی یشهیدیگن حدودلر»نی بامباردمان قیلگن.
طالبلر مطبوعات سوزلاوچیسی ذبیحالله مجاهدنینگ ایتیشیچه، «کنرده بیر عیال و ایکّی اېرکک هلاک بۉلگن، ایکّی عیال و ایکّی اېرکک یرهلنگن. اولر نینگ برچهسی تینچ اهالی و محلي اهالیدیر».
اونینگ قۉشیمچه قیلیشیچه، «پکتیکاده بیر اوی و بیر دوکان بامباردمان قیلینگن، بیراق انسان تلفاتی قید اېتیلمهگن».
بیراق پاکستان اخبارات و نشرلر وزیرلیگی اوشبو هجوملرده پاکستان طالبلر حرکتی (تیتیپی) و اونگه علاقهدار گروهلر نینگ یشیرین جایلری همده بازهلری نشانگه آلینگنینی دعوا قیلدی.
وزیرلیککه کۉره، هجوملرده کمیده ۲۸ نفر «ترورچی»، جملهدن بیر نېچه خودکوشلیک هجومچیلری اۉلدیریلگن.
پاکستاننینگ افغانستانگه ینگی هوا هجوملری خیبر-پختونخوا ایالتی نینگ کوهات اولسواللیگیده پولیس مجموعهسیگه اویوشتیریلگن و ۳۱ کیشی نینگ، جملهدن ۱۶ نفر پولیس خادیمی نینگ اۉلیمیگه همده ۱۰۰ نفردن آرتیق کیشی نینگ یرهلنیشیگه سبب بۉلگن قانلی هجومدن ایکّی کون اۉتیب صادر اېتیلدی.
اوشبو هجوم اوچون حافظ گُل بهادر باشچیلیگیدهگی «اتحاد المجاهدین» گروهی جوابگرلیکنی اۉز ذمّهسیگه آلگن. پاکستان رسميلری بو گروه افغانستان توپراغیده موجود و فعالیت یوریتیشینی بیر نېچه بار دعوا قیلگن.
