طالبلر تشقی ایشلر وزیرلیگی پاکستان‌نینگ کابلده‌گی اېلچیخانه‌سی سرپرستینی چقیریب، اونگه «ديورند چیزیغیدن نورستان تامان قوراللی بوزغونچی عنصرلر نینگ کیریب کېلیشی» مسأله‌سیده‌گی ناراضیلیک عریضه‌سینی تاپشیرگنینی معلوم قیلدی.
اوشبو وزیرلیک بوگون (سه‌شنبه، ۷ میزان) بېرگن بیاناتیده طالبلر «پاکستان حربي رژیمی نظارتیده‌گی منطقه‌لرده بوزغونچی عنصرلرنی جلب قیلیش، بیرلشتیریش، اۉقیتیش و جهازلش اوچون شرایط یره‌تیلیشی، کېین اېسه اولرنی پاکستان اوردوسی تامانیدن ديورند چیزیغی‌نینگ بو تامانیگه یۉنه‌لتیریلیشی و یوباریلیشینی قطعا قاره‌له‌یدی»، دېب ایتگن.
طالبلر تشقی ایشلر وزیرلیگی «پاکستان حربي رژیمی‌نینگ بو حرکتلری افغانستان حاکمیتی و حدودي یخلیتلیگی‌نینگ آچیقدن-آچیق بوزیلیشی بۉلیب، اسلامي، خلق‌ارا، انسانپرورلیک و یخشی قۉشنیچیلیک تمایللریگه ضددیر»، دېیه قۉشیمچه قیلگن.
وزیرلیک بونده‌ی مسوولیتسیز و اۉیله‌مسدن عملگه آشیریله‌یاتگن حرکتلرنینگ دوام اېتیشی همده اونینگ آغیر عاقبتلری اوچون تۉلیق جوابگرلیک پاکستان حربي رژیمی ذمّه‌سیده بۉلیشیدن آگاهلنتیرگن.
«افغانستان آزادلیک جبهه‌سی» ایکّی کون اوّل نورستان‌نینگ کامدیش اولسواللیگیده طالبلر بیلن تۉقنه‌شوو صادر بۉلگنینی معلوم قیلگن. اوشبو جبهه‌نینگ دعوا قیلیشیچه، تۉقنه‌شووده طالبلرنینگ ۳۷ اعضاسی هلاک بۉلگن و ۲۴ نفری یره‌لنگن.
طالبلر مدافعه وزیرلیگی هم اوشبو تۉقنه‌شوونی تصدیقلب، اونده اشتراک اېتگن شخصلرنی «داعش فتنه‌چیلری و یاووزلیک همده فساد عنصرلری» دېب اته‌گن و اولر پاکستان‌دن افغانستان‌گه یوباریلگنینی بیلدیرگن. وزیرلیک‌نینگ ایتیشیچه، طالبلر کوچلری‌نینگ هجوملری عاقبتیده ۲۸کیشی هلاک بۉلگن، ینه ۳۲ کیشی حبسگه آلینگن.
بیراق پاکستان اخبارات و نشرات وزیرلیگی طالبلر مدافعه وزیرلیگی‌نینگ دعواسینی رد اېتیب، اونی «پوج و اساسسیز» دېب اته‌گن همده اوشبو تۉقنه‌شووده پاکستان‌نینگ اشتراکینی تصدیقلاوچی هېچ قنده‌ی دلیل موجود اېمسلیگینی بیلدیرگن.
