قندهارده‌گی منبعلرنینگ خبر بېریشیچه، طالبلر اوّلگی حکومت دوریده اوشبو ولایت گیاهوند مادّه‌لر بیلن کوره‌ش اداره‌سی باشلیغی بۉلگن گُل محمد شکران و اونینگ اۉغلی نذیر احمد شکراننی حبسگه آلگن.
منبعلرگه کۉره، اوشبو سابق حکومت رسميسی بوگون (سه‌شنبه، ۷ میزان) اۉغلی بیلن بیرگه قندهارده‌گی طالبلر امنیه قوماندانلیگی کوچلری تامانیدن حبسگه آلینگن.
منبعلر گُل محمد شکران حاضر خصوصي شفاخانه‌ده ایشلشینی، کېچه اوشبو شفاخانه‌ده بیر کیشی بیلن آغزه‌کی جنجللشگنینی و آره‌دن بیر کون اۉتیب حبسگه آلینگنینی اَیتماقده.
منبعلر خبریگه کۉره، سابق حکومت رسميسی و اونینگ اۉغلی حاضر قندهارده‌گی طالبلر امنیه قوماندانلیگی‌نینگ جنایت قیدیروو باشقرمه‌سیده سقلنماقده.
گُل محمد شکران‌نینگ قرینداشلری اونینگ حبسگه آلینگنینی تصدیقلب، او بوندن آلدین هم طالبان تامانیدن بیر نېچه بار سۉراق قیلینگنینی ایتیشگن.
قندهارده‌گی طالبلرنینگ محلي مسووللری حاضرچه اوشبو سابق محلي حکومت رسميسی‌نینگ حبسگه آلینیشی یوزه‌سیدن ایضاح بېرمه‌گن.
طالبلر افغانستان‌ده قَیته حاکمیتنی قۉلگه کیریتگنیدن بېری سابق حکومت عملدارلری و حربيلرینی اۉزباشیمچه‌لیک بیلن حبسگه آلیش، محکمه‌سیز اۉلدیریش و قییناققه سالیشده کېنگ مقیاسده عیبلنیب کېلماقده.
