اسلام‌آباد، پاکستان‌ده طالبلر مخالفتی نماینده‌لری اشتراکیده «افغانستان‌نینگ حالتی و تینچلیک سری حرکت یۉلی؛ ایچکی پرچه‌لنیش، لېگیتیملیکسیز باشقروو» ناملی ییغیلیش باشلندی.
پاکستان نینگ «خلق‌ارا پارلمان کانگرسی» دېب اته‌لووچی تشکیلاتی تامانیدن اۉتکزیله‌یاتگن اوشبو ییغیلیش بوگون (سه‌شنبه، ۷میزان) افغانستان‌نینگ سابق اخبارات و مدنیت وزیری محمد طاهر زهیر، سابق پارلمان اعضاسی امان‌الله پیمان همده منطقه دولتلری وکیللری اشتراکیده باشلندی. ییغیلیش اېرته‌گه هم دوام اېته‌دی.
ییغیلیشنی اۉتکزیشدن مقصد افغانستاندهگی لېگیتیملیک انقراضی، مملکتده‌گی تروریزم و اونینگ قۉشنی همده منطقه دولتلری اوچون خوفلری، شونینگدېک، افغانستان‌ده تینچلیککه اېریشیش یۉللرینی محاکمه قیلیش اېکنی ایتیلگن.
اوشبو ییغیلیشده تاجیکستان، قازاقستان، قیرغیزستان، چین و روسيه کبی دولتلرنینگ وکیللری اشتراک اېتیب، افغانستاندهگی جاري وضعیت یوزه‌سیدن اۉز قره‌شلرینی بیلدیردیلر.
ییغیلیش‌نینگ بیرینچی کونیده سۉزگه چیققنلر افغانستان‌ده ترورچی گروهلر موجودلیگیدن خواطر بیلدیردیلر همده بونینگ قۉشنی و منطقه دولتلری خوفسیزلیگیگه تأثیریدن آگاهلنتیردیلر.
شونینگدېک، اولر افغانستاندهگی سیاسي و خوفسیزلیک انقراضینی اینکلیوز و دیموکرا‌تیک حکومت توزیلمه‌سدن توریب حل قیلیب بۉلمسلیگینی تأکیدله‌دیلر. اولرنینگ ایتیشیچه، طالبلر افغانستان‌نینگ برچه اهالیسینی وکیللیک قیلمه‌یدی و حاضر مملکت اهالیسی‌نینگ اکثریتی حاکمیتده هېچ قنده‌ی صلاحیتگه اېگه اېمس.
ییغیلیشده افغانستان نامیدن قتنه‌شه‌یاتگن محمد طاهر زهیر و امان‌الله پیمان طالبلر تامانیدن پشتون بۉلمه‌گن اېتنیک گروهلر نینگ باستیریلیشی و چېتلشتیریلیشی همده همه‌شمول حکومت توزیلمه‌گنی مسأله‌سیگه توخته‌لدیلر. اولر وضعیتنی اۉزگرتیریش و برچه گروهلرنی قمره‌ب آلووچی حکومت توزیش اوچون منطقه و خلق‌ارا همجعیت دولتلریدن یاردم سۉردیلر.
پاکستان‌نینگ اخبارات و نشرلر وزیری عطاالله ترار هم ییغیلیش‌نینگ آچیلیش مراسمیده سۉزگه چیقیب، افغانستان ترورچیلر باش‌پناه‌سیگه ایلنگنینی ایتدی.
او طالبلر بیلن کېسکینلیک و تۉقنه‌شوولرگه اشاره قیلیب، پاکستان بیر نېچه بار کېسکینلیک و معمالرنی ملاقات همده مذاکره‌لر آرقه‌لی حل قیلیشنی سۉره‌گنینی بیلدیردی. بیراق ترورچی گروهلر‌نینگ فعالیتی دوام اېته‌یاتگنی پاکستان و طالبلر اۉرته‌سیده‌گی مناسبتلرنی یخشیلش یۉلیده‌گی اېنگ کتّه تۉسیق بۉلیب قاله‌یاتگنینی تأکیدله‌دی.
مذکور ییغیلیش طالبلر و پاکستان اۉرته‌سیده‌گی مناسبتلر ینه کېسکینلشگن بیر پیتده اۉتکزیلماقده. ایکّی تامان هم بیر-بیرینی اۉز حدودیدن ایکّینچی تامانگه قرشی فایده‌لنیشده عیبله‌ماقده.
طالبلر بوگون افغانستان اېلچیخانه‌سی سرپرستی سۉنگگی کونلرده نورستان‌ده یوز بېرگن تۉقنه‌شوولرده اوشبو دولت‌نینگ قۉلی بارلیگی حقیده‌گی عیبلاولر یوزه‌سیدن چقیردی. شونینگدېک، پاکستان هم یقینده خیبر-پختونخوا ایالتی‌نینگ دیره اسماعیل‌خان منطقه‌سیده صادر بۉلگن هجوم مناسبتی بیلن اسلام‌آبادده‌گی طالبلر اېلچیخانه‌سی سرپرستینی چقیرگنی ایتیلماقده.
