امریکا بیلن اوروشنی یکونلش بۉییچه ایران رسميلری و قطر واسطه‌چیلری اۉرته‌سیده‌گی مذاکره‌لرده ایجابي سیلجیش بۉلیشیگه امیدلر آرتگنی آرتیدن جهان بازارلریده خام نفت نرخی قریب تۉرت فایزگه په‌سه‌یدی.
رویترز خبریگه کۉره، بوگون (دوشنبه، ۱۱ عقرب) گرینویچ وقتی بیلن ساعت ۹:۰۰حالتیگه کۉره، برېنت خام نفتی نرخی ۳.۷فایزگه په‌سه‌ییب، بیر بررېلی ۱۰۹.۲۳ دالرگه توشگن.
بو نشر نینگ قۉشیمچه قیلیشیچه، «توست تگزاس اینترمدیت» خام نفتی نرخی هم ۳.۸۹فایزگه په‌سه‌ییب، بیر بررېلی ۱۰۰.۱۴ دالرگه یېتگن.
رویترز نینگ یازیشیچه، مذاکره‌لر یقین شرقده نفت تأمیناتیده‌گی اوزیلیشلر کمه‌ییشی ممکنلیگی حقیده امید اویغاتگن.
اېران رسميلری و قطر واسطه‌چیلری اۉرته‌سیده‌گی مذاکره‌لر جمعه کونی تهرانده باشلنگن، شنبه کونی دوحه‌گه کۉچیریلگن و یکشنبه کونی هم قطر پایتختیده دوام اېتگن. بو مذاکره‌لر واشینگتن بیلن موافقلشتیریلگن حالده آلیب باریلگن.
رویترز خبردار منبعگه ته‌یه‌نیب خبر بېریشیچه، ایران مذاکره‌چیلری یکشنبه کونی دوحه‌نی ترک اېتگن، بیراق بو مذاکره‌لرده معما یوزه‌گه کېلگنی بیلن باغلیق اېمس.
اېران امریکا و اسرایل نینگ بو مملکتگه هجوملری باشلنگنیدن سۉنگ هرمز بۉغازینی یاپگن. دنیا نفتی و گازی نینگ قریب 20 فایزی تشیله‌دیگن اوشبو خلق‌ارا سوو یۉلی نینگ یاپیلیشی جهان بازارلریده نفت نرخی نینگ کېسکین آشیشیگه سبب بۉلگن.
اېران و امریکا اۉرته‌سیده‌گی صلحدن سۉنگ مذاکره‌لر جریانی همده ایکّی تامان نینگ هرمز بۉغازینی باشقریش و قَیته آچیش مسأله‌سیده‌گی کېلیشماوچیلیکلری نفت نرخیگه تأثیر کۉرسه‌تگن. جمله‌دن، کېسکینلیک کوچه‌یگنیده نفت نرخی آشگن، کېسکینلیک کمه‌ییشی و کېلیشووگه اېریشیش امیدلری کوچه‌یگنیده اېسه نفت نرخی په‌سه‌یگن.
