رویترز خبرگزارلیگینینگ خبر بېریشیچه، قطر پایتختی دوحهده بۉلیب اۉتگن ایران و امریکا اۉرتهسیدهگی نوبتدهگی مذاکرهلر دایمي تینچلیک سری سېزیلرلی یوتوقلرسیز یکونلنگن.
مذاکرهلردن خبردار منبعلرگه کۉره، ایکّی دولت وکیللری ایکّی کون دوامیده هرمز بۉغازیدهگی دېنگیز قتناوی همده ایراننینگ موزلهتیلگن بایلیکلرینی آزاد قیلیش مسألهلرینی محاکمه قیلگن. حالبوکه، اوشبو ایکّی مهم مسأله دستلبکی کېلیشووده حل اېتیلگنی اعلان قیلینگن اېدی.
قطر تشقی ایشلر وزیرلیگینینگ معلوم قیلیشیچه، نوبتدهگی اوچرهشوو ایراننینگ سابق عالي رهبری آیتالله علی خامنهاي نینگ دفن مراسمیدن سۉنگ، کېلهسی هفته اۉتکزیلهدی.
قطر تشقی ایشلر وزیرلیگی مطبوعات سۉزلاوچیسی ایکس اجتماعي ترماغیدهگی بیاناتیده دوحه مذاکرهلری جون آییده اوروشنی تۉختهتگن کېلیشووگه عاید مسألهلر بۉییچه «ایجابي سیلجیش» یوزهگه کېلتیرگنی همده سویسده بۉلیب اۉتگن ییغیلیش نتیجهلریگه اساسلنگنی حقیده یازگن.
امریکا جمهور رییس دونالد ترامپ اېسه تامانلر ایران هسته دستوریگه قۉییلیشی ممکن بۉلگن چېکلاولر بارهسیده معین یوتوقلرگه اېریشگنینی ایتدی.
او ژورنالیستلرگه: «ایراننینگ هستوي قورالسیزلنتیریلیشی یخشی کېتماقده. اولر جوده یخشی اوچرهشوولر اۉتکزیشدی، نتیجهسینی کۉرهمیز»، دېدی.
امریکا و ایران اۉرتهسیدهگی مذاکرهلرنینگ ینگی باسقیچی ایکّی تامان اۉرتهسیدهگی قوراللی تۉقنهشوو و اۉزارا هجوملردن کېین اۉتکزیلدی.
ایران تشقی ایشلر وزیری اۉرینباسری و مملکت نینگ تخنیکي مذاکرهلر گروهیگه رهبرلیک قیلهیاتگن کاظم غریبآبادي تامانلر کېلیشوو بوزیلیشی حالتلرینی کۉریب چیقیش اوچون «فوق العاده علاقه کانالی» تشکیل اېتیشگه قرار قیلگنینی بیلدیردی.
اونینگ قۉشیمچه قیلیشیچه، قطرده موزلهتیلگن ایران مبلغلریدن فایدهلنیش ترتیبی هم محاکمه قیلینگن و ایران تامانیدن بیلدیریلگن احتیاجلر اساسیده ضرور محصولاتلرنی خرید قیلیب، مملکتگه یېتکزیب بېریشگه کېلیشیب آلینگن.
